Til bayram (Orta topar) scenariyi Ta`rbiyashi

Til bayram (Orta topar) scenariyi
Ta`rbiyashi: Sa`lemnama
Assalawma-aleykum dep,
Sálem beriw saltımız.
Hár qashan da aman bolsın,
Óner súygen xalqımız.
Qaraqalpaq tiline mámleketlik til biyligi berilgenine 33jıl toldı. Bul bir insannıń dúnyaǵa kelip, eseyip, kúsh-ǵayratqa tolǵanı menen teń. Mákeme hám shólkemlerde hújjetler qaraqalpaq tilinde júrgiziletuǵın boldı.
Elimiz ǵárezsizlikke eriskennen keyin respublikamızda kóp qabatlı imaratlar, zamanagóy turaq jaylar, supermarketler kóshelerimizdiń shırayına shıray qospaqta. Búgingi kúnde turmısımızdı sawda tarawısız kóz aldımızǵa keltire almaymız. Zamanagóy supermarketler, restoranlar sulıw sawlatı menen kózlerimizdi qamastıradı.
Óz ana tilimizge bolǵan húrmet eń dáslep sóylegen sózimizden bilinedi, perzentlerimizdiń sóylegen sózlerinen bilinedi. Watanımızdı, ata-anamızdı, shańaraǵımızdı qanday qádirlesek, ana tilimiz bolǵan qaraqalpaq tilin de sonday qádirleyik, húrmet eteyik.
Qaraqalpaq xalıq shayırı Tolıbay Qabulovtıń mına qosıq qatarları júregi qaraqalpaqpan dep soqqan hár bir insannıń yadınan shıqpasa kerek:

Ana tilim – ada bolmas baylıǵım,
Maqtanıshım, onnan tuwǵan ay kúnim,
Qırq mıń qızıl altınǵa da bermeymen,
Hátteki bir ashıwımnıń qaytıwın.
Ana tilim – meniń ata-anam bul,
Hár túbi bir shayqatılǵan shaqań bul,
Olar menen birge ómir súrmesem,
Kerek emes maǵan jaqtı jahan bul.
Endigi na`wbette balalar atqarıwında “Ana tilim” taqmag`i

1. 
   Ana tilim - ar namısım,
   

Milletimniń aynası,
Ana tilim – tarıyxım,
Babalardıń miyrası.

2. 
   Ana tilim –ózligim,
   

Milliyligim ol meniń.
Ana tilim – teńligim,
Erkinligim ol meniń.

3. 
   Ana tilim – xalqımdur,
   

Ana tilim – milletim.
Ana tilim – baxtımdur,
Ana tilim – qúdiretim.

4. 
   Ana tilim – maqtanıshım,
   

Ana tilim – baylıǵım.
Ana tilim – keleshegim,
Ol ómirim shadlıǵım.

5. 
   Ana tiliń-arıń bul,
   

Onı heshbir kirletpe
Áwladlarǵa tabıs et,
Mángi onı qádirle.

6. 
   Ana tilim-quralım,
   

Jaǵar elge shıraǵın.
Ana tilin húrmetle,
Aǵızǵan bilim bulaǵın.

Ibrayım Yusupovtıń “Watan” qosıǵı Balalar atqariwinda ha`mme birgelikte:
Ana-tilim meniń ata-anam bul
Hám túbi bir shayqatılǵan shaqam bul
Olar meniń birge ómir súrmesem
Kerek emes maǵan jaqtı jáhan bul.
Ana-tilim arı bolıp babamnıń
Kóshin tartıp kelgen neshshe zamannıń
Eger jolda ol da jazım bolǵanda
Házirge til berip turar oǵan kim?
Qizlardin atqariwinda Ayaq oyını “Qaraqalpaǵım” qosıǵına
Endi názerińizge balalar naqıl-maqallardı aytıwı:

1. 
   Aqıl kórki-til, tildiń kórki sóz.
   

Adam kórki-júz, júzdiń kórki-kóz.

2. 
   Biyday nanıń bolmasa da, biyday sóziń bolsın.
   

3. 
   Jıllı-jıllı sóyleseń, jılan innen shıǵadı,
   

Qattı - qattı sóyleseń musılman dinnen shıǵadı.

4. Ózińdi sıylaǵannıń sózin sıyla,
Jaqsı sóz benen doslar jıyna.


5. Tilde tıyǵan durıs boladı,
Tıymasa urıs boladı.


6. Aytqan sózdiń maǵanasın bilmese,
Ol adamnan tilsiz ósken lal jaqsı

7. 
   Dana sózli adam kerek jasawı,
   

Aqıl bolar eken tildiń tusawı.

8. 
   Danıshpan boladı bilip sóylegen,
   

Sol ushın da onıń sózi ólmegen.


Ta`rbiyashi: Ba`rekelle balalar ha`mmen`iz bu`gingi Til bayram keshesin jaqsi o`tkerdin`iz. Taqmaqlardi jaqsi aytip ha`m naqil – maqallardida jaqsi aytip o`ttin`iz, qizlarimiz ayaq oyindi jaqsi atqarip berdi.
Balalarg`a Tilimiz qanday qa`dirli ekenin tusindirip o`tti. Til-millet maqtanıshı. Házir qaraqalpaq tili oǵada bay milliy ádebiy tillerdiń birine
aylandı. 1-dekabr “Til bayramı” sıpatında hár jılı bayramlanadı.Sizlerdi usı
bayram menen Orta gruppanin` tarbiyalaniwshilari qutlıqlap o`tti.