Қурилиш баҳосини шартномавий жорий нархларда аниқлаш

С=(Со+См+Сзп+Сэм+Сп+Пп+Ср)хКр,

бу ерда:
Со – “тўлиқ топшириладиган (под ключ)” қурилишда ускуна, мебель ва инвентарга сарфланган харажатлар;

См – қурилиш материаллари, маҳсулотлари ва конструкцияларга сарфланган харажатлар;
Сзп – ижтимоий суғурта тўловлари билан қўшиб ҳисобланган асосий иш ҳақи учун сарфланган харажатлар;
Сэм – машина ва механизмлар эксплуатациясига сарфланган харажатлар;
Сп – ишлабчиқариш билан боғлиқ бўлган бошқа харажатлар;
Пп – пудратчининг бошқа харажатлари;
Ср – қурилиш вақтида қурилиш объектларини суғурталашга сарфланган харажатлар;
Кр – келгуси йил учун қурилишда нархлар ўсишини прогнозлаштирилган индексидан келиб чиқадиган таваккалчилик коэффициенти.
4.6. Қурилиш материаллари, маҳсулотлари, конструкциялари, ускуналар, мебель ва инвентарь учун сарфланадиган харажатлар транспорт, тайёрлаш-омборда сақлаш харажатлари ва импорт материаллар, ускуна, мебель ва инвентарь учун қонунчиликда белгиланган божхона тўловларини қўшиб ҳисобланган ишлаб чиқарувчи (етказиб берувчи) корхоналарнинг нархлари қўлланилиб лойиҳа спецификацияларига мувофиқ тарзда тузилган ресурс рўйхатларга асосланиб ёки мазкур ҳудудда шаклланган нархлар мониторинги асосида тузиладиган маълумотлар банки бўйича аниқланади.
4.7. Турли қурилиш материаллари, маҳсулотлари, конструкциялари, ускуналари, мебель ва инвентарнинг ўртача нархи ишлаб чиқарувчи заводларнинг улгуржи нархи, қурилиш материаллари биржа ва ярмаркаларидаги нархлар, қурилиш материалларини етказиб берувчи ташкилотларнинг нархлари, Ўзбекистон Республикаси Давархитектқурилиш қўмитаси томонидан чоп этиладиган қурилиш материаллари учун жорий нархлар каталогида келтирилган нархлар асосида аниқланиши мумкин.
4.8. Иш ҳақи учун сарфланадиган харажатлар объект қурилишининг норматив меҳнат сарфини 1 киши-соат кўрсаткичининг жорий нархига (сўм) ва ижтимоий суғуртага ажратиладиган тўловларни ҳисобга олувчи коэффициентга кўпайтириш йўли билан қуйидаги формула ёрдамида аниқланади: