Ўзбекистон Республикасида меҳнат қонунчилигини тартибга солишга оид қонун хужжатлари

 Ишга қабул қилишни расмийлаштириш тартиби

• Ишга қабул қилиш иш берувчининг буйруғи билан расмийлаштирилади. Буйруқ чиқариш учун ходим билан тузилган меҳнат шартномаси асос бўлади.
• Ишга қабул қилиш ҳақидаги буйруқ тузилган меҳнат шартномасининг мазмунига тўла мувофиқ равишда чиқарилади.
• Буйруқ билан ходим имзо қўйиб таништирилади.
• Меҳнат шартномаси синов муддати билан тузилиши мумкин.
• Дастлабки синов муддати уч ойдан, ташкилотларнинг раҳбарлари ва уларнинг ўринбосарлари, бош бухгалтерлар ҳамда ташкилотлар алоҳида бўлинмаларининг раҳбарлари учун эса олти ойдан ошмаслиги керак.
• Доимий бошқа ишга ўтказиш иш берувчининг буйруғи билан расмийлаштирилади. Бошқа доимий ишга ўтказиш ҳақида буйруқ чиқариш учун ходим билан тузилган меҳнат шартномасига киритилган ўзгаришлар асос бўлади.
• Доимий бошқа ишга ўтказиш ҳақидаги буйруқ меҳнат шартномасига киритилган ўзгаришларнинг мазмунига тўла мувофиқ ҳолда чиқарилади ва имзо қўйиб таништирилади.
• Вақтинча бошқа ишга ўтказиш унинг муддати кўрсатилган ҳолда буйруқ билан расмийлаштирилади.

МЕҲНАТ ШАРТНОМАСИНИНГ БЕКОР ҚИЛИШ АСОСЛАРИ

• Меҳнат шартномаси қуйидаги сабабларга кўра бекор қилиниши мумкин:
• 1) тарафларнинг келишуви (Меҳнат Кодексининг 157-моддаси);
• 2) меҳнат шартномаси муддатининг тугаши (Меҳнат Кодексининг 158-моддаси);
• 3) меҳнат шартномасини ходимнинг ташаббусига кўра бекор қилиш (МК 160-моддаси);
• 4) меҳнат шартномасини иш берувчининг ташаббусига кўра бекор қилиш (МК 161-моддаси);
• 5) ташкилот мулкдорининг алмашганлиги, унинг қайта ташкил этилганлиги, ташкилотнинг идоравий тааллуқлилиги (бўйсунуви) ўзгарганлиги муносабати билан ходимнинг ишни давом эттиришни рад этиши (Меҳнат Кодексининг 156-моддаси бешинчи қисми);
• 6) ходимнинг янги меҳнат шартларида ишлашни давом эттиришни рад этиши (Меҳнат Кодексининг 137-моддаси тўртинчи қисми);
• 7) ходимнинг иш берувчи билан бирга бошқа жойга ишлаш учун кўчишни рад этиши (Меҳнат Кодексининг 146-моддаси бешинчи қисми);
• 8) ходимнинг тиббий хулосага мувофиқ соғлиғининг ҳолатига кўра қарши кўрсатма бўлмаган бошқа ишга ўтказишни рад этиши ёхуд иш берувчида тегишли иш бўлмаган тақдирда (Меҳнат Кодексининг 143-моддаси иккинчи қисми);
• 9) тарафларнинг ихтиёрига боғлиқ бўлмаган ҳолатлар (Меҳнат Кодексининг 168-моддаси);
• 10) янги муддатга сайланмаганлик ёки танловдан ўтмаганлик ёхуд сайловда, танловда иштирок этишни рад этиш (Меҳнат Кодексининг 169-моддаси);
• 11) Меҳнат Кодекси ёхуд бошқа қонунлар алоҳида тоифадаги ходимлар билан тузилган меҳнат шартномаларида меҳнатга оид муносабатларни тугатишнинг қўшимча асослари тўғрисидаги шартни назарда тутиш имкониятини мустаҳкамлайдиган ҳолларда меҳнат шартномасида назарда тутилган асослар.