Диссертация мавзусининг долзарблиги ва зарурати

КИРИШ (фалсафа доктори (PhD) диссертaцияси аннотaцияси)

Диссертация мавзусининг долзарблиги ва зарурати. Дунё аҳолиси сонининг муттасил равишда ўсиб бориши, иқтисодий ва ижтимоий танглик муаммолари аҳолини ижтимоий ҳимоялаш масаласини тобора қийинлашиб боришига олиб келмоқда. Шу жиҳатдан, бугунги кунда жаҳон миқёсида камбағалликни қисқартириш, мавжуд имкониятлардан самарали фойдаланиш тизимини такомиллаштириш ва бу борада изчил ислоҳотлар олиб бориш муҳим вазифалардан бири бўлиб қолмоқда.
Жаҳоннинг ихтисослашган ташкилотлари ва илмий-тадқиқот марказлари томонидан аҳолининг демографик босими кучли бўлган мамлакатларда аҳоли қатламларида камбағалликни қисқартиришнинг илмий ечимларини топиш, аҳолини касб-ҳунарга ўргатиш орқали уларнинг бандлигини таъминлаш бўйича тадқиқотлар олиб борилмоқда. Шу нуқтаи назардан, аҳоли ижтимоий-демографик ривожланишида юзага келаётган муаммоларнинг тарихий илдизларини ўрганиш, шунингдек минтақаларнинг ўзига хос имкониятларидан келиб чиққан ҳолда, камбағалликни қисқартириш усулларини ишлаб чиқиш, турмуш даражаси паст ҳудудларга қўшимча ёндашувларни татбиқ этиш, аҳоли даромад ва харажатлари миқдори ҳамда хавфсиз меҳнат миграцияси шароитларини таъминлаш тизимини янада ривожлантириш долзарб аҳамиятга эга.
Сўнгги йилларда Ўзбекистонда аҳоли турмуш даражаси ва сифатини янада яхшилаш, ижтимоий муҳофаза қилиш тизимини такомиллаштириш борасида кенг кўламли ислоҳотлар олиб борилмоқда. Айниқса, ҳудудларни ижтимоий-иқтисодий ривожлантириш, аҳолини ижтимоий қўллаб- қувватлаш, соғлиқни сақлаш тизимини тубдан такомиллаштириш, аҳоли бандлиги ва даромадларини оширишга алоҳида эътибор қаратилмоқда. “Саъй-ҳаракатларни аҳолининг эҳтиёжманд катламларини қўллаб-қувватлаш ва камбағалликни қисқартиришга йўналтириш”¹ халқаро миқёсдаги муҳим вазифа сифатида кун тартибига қўйилди. Шу жиҳатдан бу борада олиб борилган ислоҳотлар ва уларнинг натижаларини Ўзбекистон вилоятлари мисолида тадқиқ этиш Ўзбекистоннинг энг янги тарихини илмий асосда ўрганишдаги долзарб масалаларидан биридир.
Шу маънода Ўзбекистон Республикаси Президентининг “Ўзбекистон Республикасида 2022 йилда аҳолини рўйхатга олишни ўтказиш концепциясини тасдиқлаш тўғрисида” 2019 йил 5 февралдаги ПФ–5655-сон, “Иқтисодиётни ривожлантириш ва камбағалликни қисқартиришга оид давлат сиёсатини тубдан янгилаш чора-тадбирлари тўғрисида” 2020 йил 26 мартдаги ПФ–5975-сон Фармонлари, “Аҳолини ижтимоий қўллаб-қувватлашга қаратилган қўшимча чора-тадбирлар тўғрисида” 2020 йил 26 августдаги ПҚ–4815-сон, “Хавфсиз, тартибли ва қонуний меҳнат миграцияси тизимини жорий қилиш чора-тадбирлари тўғрисида” 2020 йил 15 сентябрдаги





¹ Мирзиёев Ш. Шанхай ҳамкорлик ташкилотининг навбатдаги саммитида иштирок этди // Халқ сўзи. 2020 йил 11 ноябрь.
ПҚ–4829-сон Қарорлари ва соҳага оид бошқа меъёрий-ҳуқуқий ҳужжатларда белгиланган вазифаларни амалга оширишда мазкур диссертация муайян даражада хизмат қилади.