Сенингдирман кел, гўзалим, дил уйида яшажакмиз

СЕНИНГДИРМАН

Кел, гўзалим, дил уйида яшажакмиз,

Юраклари зардоблардан бўшажакмиз,
Ушласакда, биз бир жойни ушлажакмиз,
Ёнишларда, хонишларда тенгингдирман,
Эй, Рўзигул, сенингдирман, сенингдирман.

Адашганман, дея ўзинг койимагин,

Чеҳраларинг сўлғин эмас, бўлсин гулгун,
Сен қалбимга севги бўлиб кириб келгин,
Чангда қолган гул бўлсанг, мен чангингдирман,
Эй, Рўзигул, сенингдирман, сенингдирман.

Тақдир мени раво кўрса, чекинмагин,

Сен ойсанку, ногох кўкда бекинмагин,
Севиб яша, бошқа ишга эгилмагин,
Севги деган чек тушганда чекингдирман,
Эй, Рўзигул, сенингдирман, сенингдирман.

Майли ўзинг Зайнабимсан, Кумушимсан,

Тирик бўлиб юрмоғимга юмушимсан,
Мен кетарман, ортда қолган турмушимсан,
Ишон жоним, бу туш эмас, ўнгингдирман,
Эй, Рўзигул, сенингдирман, сенингдирман.

Мендан ўзга етмагайдир ишқ қадрига,

Дил сабабдир таратгувчи дил атрига,
Жоним фидо муҳаббатнинг ҳар сатрига,
Муҳаббатда ёлғиз ўзим бегингдирман,
Эй, Рўзигул, сенингдирман, сенингдирман.


АШУРАЛИ БОЙМУРОД.