1-mavzu: innovatsion jarayonlar rivojining zamonaviy tendensiyalari. Ta’lim sifatini oshirishda o‘qituvchining innovatsion faoliyati

1-MAVZU: INNOVATSION JARAYONLAR RIVOJINING ZAMONAVIY TENDENSIYALARI. TA’LIM SIFATINI
OSHIRISHDA O‘QITUVCHINING INNOVATSION FAOLIYATI.
(2 soat)
Reja:

1. 
   Modernizatsiya, ta’lim tizimidagi innovatsion jarayonlar, ta’lim tizimini modernizatsiyalashning nazariy asoslari. Innovatsion jarayonlarning kechish bosqichlari.
   
2. 
   Pedagogik texnologiyaning tasnifi, qonuniyatlari, tamoyillari va mezonlari. Ta’lim-tarbiya jarayonini texnologiyalashtirish asoslari.
   
3. 
   Ta’lim sifatini oshirishda o‘qituvchining innovatsion faoliyati: pedagogik innovatsion faoliyat belgilari. Pedagogda ta’lim jarayoniga innovatsion yondashuvni qaror toptirish bosqichlari.
   
4. 
   Innovatsion ta’limda ilg‘or xorijiy tajribalar integratsiyasi. Kredit tizimi. ECTS kreditlari: xususiyatlari va tamoyillari.
   

Tayanch tushunchalar: modernizatsiyalash, ta’lim jarayonini modernizatsiyalash, texnologiya, pedagogik texnologiya, texnologiyalashtirish, ta’lim jarayonini texnologiyalashtirish, tarbiya jarayonini texnologiyalashtirish, innovatsiya, novatsiya, innovatsion ta’lim texnologiyalari, innovatsion jarayon, ta’limiy innovatsion jarayon, ta’limiy innovatsion jarayon bosqichlari.
Modernizatsiya, ta’lim tizimidagi innovatsion jarayonlar, ta’lim tizimini modernizatsiyalashning nazariy asoslari.
Ilm-fan, texnika, ishlab chiqarish va texnologiyaning jadal rivojlanishi jamiyat hayotining barcha sohalarida taraqqiyotining yangi istiqbollarini ochib berdi. Insoniyatning davlat va jamiyat qurilishiga doir asriy tajribalari ijtimoiy munosabatlarni yangicha yondashuvlar asosida tartibga solish borasidagi ilg‘or yondashuvlarning qaror toptirilishiga olib keldi. Mazkur yondashuvlarning mohiyati so‘nggi yillarda umumiy tarzda “modernizatsiyalash” tushunchasi yordamida ifodalanib kelinmoqda. Xo‘sh, “modernizatsiya” tushunchasi lug‘aviy jihatdan qanday ma’noni anglatadi? Ushbu tushuncha negizida qanday holat tavsiflanadi?
Modernizatsiya (ingl. “modern” – zamonaviy, ilg‘or, yangilangan) – ob’ektning yangi talablar va me’yorlar, texnik ko‘rsatmalar, sifat ko‘rsatkichlariga mos ravishda yangilanishi sanaladi.
Odatda modernizatsiya jarayonida mashinalar, dastgohlar, ishlab chiqarish qurollari hamda texnologik jarayonlar yangilanadi. Biroq, ilm-fan, texnika, ishlab chiqarish va texnologiyalarning rivoji tufayli jamiyat ham rivojlanishning muayyan bosqichidan yanada takomillashgan bosqichga o‘tadi. Falsafiy talqinda ifoda etganda miqdor o‘zgarishlari tub sifat o‘zgarishlariga aylanadi. M: o‘rta asrlarda agrar xarakter kasb etgan jamiyat ilm-fan, texnika, sanoat va ishlab chiqarishning rivojlanishi bilan industrial jamiyatga aylandi.
Ijtimoiy modernizatsiya jamiyatning ijtimoiy tizimdan ochiq fuqarolik jamiyatiga aylanishini anglatadi. Ushbu turdagi modernizatsiya negizida jamiyatning ijtimoiy qatlamlarida umumiy yoki xususiy xarakterdagi yangilanishlar sodir bo‘ladi. Jumladan, ta’lim sohadagi yangilanishlar ham shular jumlasidandir.