11-ámeliy jumıs Toqımashılıq óriliwleri, olardıń dúzilisi hám de sxematik kórinislerin anıqlaw

11-ámeliy jumıs Toqımashılıq óriliwleri, olardıń dúzilisi hám de sxematik kórinislerin anıqlaw
Toqımashılıq buyımlarına gezleme, trikotaj, toqıma emes materiallar, (TE) esilgen ónimler, tigilgen satıwshılıq buyımlar kiredi. Toqımashılıq buyımlar tiykarınan kiyim-kenshek, úy-xojalıq buyımlarına isletiledi. Toqımashılıq buyımlar texnikada hám medicinada da isletiledi. Ulıwma 35-40 % toqımashılıq buyımları kiyim kenshek ushın isletiledi. Xojalıq maqsetler ushın 20 -25 % hám basqa maqsetler ushın 10 % ke shekem isletiledi. (Materiallıq buyımlar, medicinada hám basqa maqsetler ushın ). Texnikada bolsa 30 -35 % isletiledi.
Gezlemeler klassifikaciyası. Gezlemeler: talshıq quramı, isletiliwi, olardı islep shıǵarıw hám párdozlaw usılı boyınsha ayırım gruppalarǵa bólinedi.
a) Talshıq quramı boyınsha
1. Birdey sabaqlardan toqılǵan materiallar (paxta, jún, jipek, ziǵir)
2. Hár túrlı sabaqlardan toqılǵan gezlemeler (tanda hám jip hár túrlı sabaqlar)
3. Qospa talshıqlardan jıynalǵan sabaqlardan toqılǵan gezlemeler (paxta, lavsan).
b) Isletiw boyınsha
1. Xojalıqta isletiletuǵın gezlemeler.
2. Kiyim-kensheklerge isletiletuǵın gezlemeler.
3. Texnikada isletiletuǵın gezlemeler (kord, brezent, uzatma qayıslar )
c) Islep shıǵarıw boyınsha
1. Tegis betli gezlemeler (shıt, satin, sarja).
2. Túkli gezlemeler (maqpal).
3. Gezlemelerdi taraw nátiyjesinde payda bolǵan túkli gezlemeler (bayka-bir tárepli túkli gezlemeler, bomazey-eki tárepli túkli gezleme).
4. Ala gezleme (hár túrlı reńli sabaqlardan toqılǵan gezleme shotlanka).
5. Kóp qabatlı gezlemeler (1. 5; 2; 3 qabatlı gezlemeler).
d) Párdazlaw boyınsha
1. Shiyki toqıma.
2. Aǵartılǵan toqıma.
3. Tegis reńge boyalǵan toqıma.
4. Gúl basılǵan gezlemeler.
Gezlemelerge arnawlı qayta islew jolı menen kerekli ózgeshelikke iye bolǵan gezlemeler alınadı, yaǵnıy: kem kirisetuǵın kem ǵıjımlanǵan, suw ótpkizbeytuǵın hám t.b.