3-амалий машғулот. Мультимедиали интерактив ўқув-услубий қўлланмаларни ва электрон таълим ресурсларини яратиш, улардан таълим тизимида фойдаланиш. Qr-код ва ундан фойдаланиш

3-амалий машғулот. Мультимедиали интерактив ўқув-услубий қўлланмаларни ва электрон таълим ресурсларини яратиш, улардан таълим тизимида фойдаланиш. QR-код ва ундан фойдаланиш.

Зуфаров Зоир Махмудович

Ишнинг мақсади – мультимедиали интерактив ўқув-услубий қўлланмаларни ва электрон таълим ресурсларини яратиш, улардан таълим тизимида фойдаланиш, QR-коддан фойдаланиш бўйича билим ва кўникмаларни такомиллаштириш.
Назарий маълумотлар
Кейинги йилларда мультимедиа ҳужжатларини яратишга оид жуда кўплаб дастурий таъминотлар ишлаб чиқилган. Улардан бири AutoPlay Media Studio дастуридир. Исталган файл ёки файллар тўпламини битта муҳитга бирлаштириш, қолаверса, CD ёки DVD дисклар учун AutoRun-менюси ҳосил қилишда AutoPlay Media Studio энг кучли визуал пакет ҳисобланади.
Мультимедиа технологияларига асосланган амалий дастурларни яратиш учун AutoPlay Media Studio дастуридан фойдаланиш фойдаланувчилар учун жуда осон ва қулай интерфейсни тақдим этади. AutoPlay Media Studio билан ишлашда деярли дастурлаш ишлари талаб қилинмайди. Фойдаланувчи фақат турли дизайнли дастурий муҳитни танлаш учун бир нечта тайёр шакллардаги лойиҳа шаблонларидан фойдаланиши мумкин. Бунда амалий дастур муҳитини дизайнга бой ҳолатга ташкил этиш учун AutoPlay Media Studio дастурий воситаси таркибида тайёр объектлар мавжуд бўлиб, улар таркибига буйруқ тугмаси, товуш кучайтиргичи, файлларни принтердан босмага чиқаришни таъминловчи, Web-сайтларни очувчи ва уларга мурожаатни амалга ошириб берувчи қатор функционал объектларни киритиш мумкин. Амалий дастур учун график қобиқларни яратиш, уни автоматик ишга тушириш учун AutoPlay Media Studio барча керакли файлларни ўзи яратади. Фойдаланувчилар зиммасига эса фақат қаттиқ диск ва компакт дикларни ёзиш учун тайёр лойиҳаларни шакллантириш вазифаси қолади.
2015 йилдан Indigo Rose Corporation (https://www.indigorose.com/) компанияси AutoPlay Media Studio 8.5 версиясини истеъмолга чиқарди. Дастур фойдаланувчиларга объектларни ўзаро боғлашни амалга оширишга ёрдам берадиган юзлаб воситаларни тақдим эта олади. AutoPlay Media Studio дастури муҳитида Visual Basic, Visual С++, Java, Adobe Flash каби қатор тизимларда яратилган ҳужжатларни ҳам бемалол қайта ишлаш мумкин.
Дастур ёрдамида анимацияланувчи менюни, каталоглар дарахтини, маълумотлар базасини ва шунга ўхшаш объектларни нафақат тез яратиш, балки уларни бошқариш ҳам мумкин.
Автоматик ишга тушувчи ойналарни ўзининг кутубхонасидаги “ниқоб”лардан фойдаланган ҳолда ихтиёрий шаклда (формада) яратиш мумкин. Бундай “ниқоб” сифатида .jpg, .bmp ва .png каби форматдаги файллардан фойдаланилса ҳам бўлади. Қолаверса, маълумотларни СD учун тайёрлаган ҳолда уни дастурнинг ўзидан туриб, СD ёки DVDга ёза олиши AutoPlay Media Studio дастури нақадар кенг имкониятларга эга эканлигини кўрсатади.
Тайёр лойиҳа бунда *.ехе кенгайтмали файл сифатида ўзи очилувчи архив кўринишда ёки қаттиқ дискдаги алоҳида каталогда шакллантирилиши мумкин. Бундан ташқари, дастурга матнни орфографик текшириш имконияти ҳам киритилган. Дастурнинг бу хоссаси унинг Label, Paragraph ва Button каби объектлари билан бирга ишлайди. Агар дастур компьютерга тўлиқ версия билан ўрнатилган бўлса, матнни орфографик текшириш учун унинг кутубхонасида жуда катта ҳажмдаги луғатлар бўлиши мумкин.
Шундай қилиб, AutoPlay Media Studio 8.5 нинг янги версияси қуйидаги имкониятларга эга ҳолда истеъмолга чиқарилган:
1. Автоматик ишга тушувчи хусусий меню, интерфаол тақдимотлар, мултимедиа-иловалар, саноқли дақиқаларда дастурий таъминотларни яратиш.
2. Лойиҳага турли-туман фотография, мусиқа, видео, анимация, матн ва бошқаларни бириктира олиш хусусияти.
3. Web-илова яратишга мўлжалланган мукаммаллашган инструментлар.
4. XML, SQL ва шифрлаш механизмлари билан ишлай олиши.
5. rtf-форматли ҳужжатлар билан ишлай олиши.
6. Слайд-шоу билан ишлаш имконияти.
7. Матн рангини ўзгартириш учун RadioButton объектининг мавжудлиги.
8. Босмага чиқаришнинг кенгайтирилган функцияси.
9. Объектларни форматлаш имконияти
10. Калит сўзлар ёрдамида қидирув тизимининг мавжудлиги.
11. СD, DVD каби компакт дискларга ёзиш имконияти ва ҳоказо.