3-tema. Publicistikalıq stil. Tekst túrleri. Maqala hám onıǹ janrları. Prezentaciya tili. Internet tili. Reklama. Intervyu alıw hám reportaj tayarlaw Jobası

2.Reklama túrleri
Reklama - bul qarıydarlardı eskertiw, tovarlar hám xızmetlerge talaptı jaratıw maqsetindegi hár qıylı xızmet túrleri tuwralı maǵlıwmat. "Reklama" termini latın tilindegi "reklamare" sózinen kelip shıqqan ("bálent dawısta baqırıw" yamasa "xabar beriw"). Izertlewshiler reklamanıǹ tómendegi qásiyetlerin ajıratıp kórsetedi:
1) ekonomikalıq funkciyası: sheber reklama tovarlardı satıwdı xoshametleydi hám payda ósiwine járdem beredi;
2) informaciyalıq funkciyası: qarıydarlardı tovarlar hám xızmetler tuwralı xabardar etiw;
3) kommunikativ funkciyası: reklama maǵlıwmat beredi hám óndiriwshilerdiń imidjini jaratadı;
4) estetikalıq funkciyası: izertlewshiler reklama hám kórkem-óner ortasındaǵı tıǵız baylanıstı ashıp beredi, geyde reklama ózi kórkem-óner túrlerinen biri esaplanadı.
Zamanagóy bazar sharayatında qandayda bir sawda kárxanası óz iskerligin ol yamasa bul formada reklamasız tabıslı alıp bara almaydı. Biraq reklama tekstleri jańa ásirde oylap tabılmaǵan. Olardıń kelip shıǵıwı dáslepki áyyemgi dáwirlerge barıp taqaladı. Áyyemgi dáwirlerde reklama iskerligi aktiv rawajlanǵan. Eń áyyemgi sawdagerler tuwrıdan-tuwrı awızsha baylanıs arqalı qarıydarlar menen múnásibetlerdi ornattı. Sawda orınları satıwshılardıń bálent hám tákirarlanatuǵın qıshqırıwları menen daǵaza etildi.
Áyyemgi Rimde reklama ushın arnawlı diywallar- albumslar tiklengen. Bul diywallarǵa túrli xabarlar kómir menen jazılǵan. Arnawlı reklama uchun diywallardan basqa diywallarda da reklamalar tolıp ketken soǹ Rim húkimeti qarar shıǵarıwǵa májbúr boladı. Qararda: “Diywallarǵa jazıw qadaǵan etiledi. Kimde-kim jazsa, oǵan ǵam-qayǵı, áwmetsizlik bolsın”, - delingen.
XV ásirde háreketleniwshi baspa háriplerdiǹ oylap tabılıwı reklamanıǹ jáne de rawajlanıwına sebep boldı. 1450-jılda Guttenberg Evropada pechatlı (baspa) qaǵazlardı islep shıǵara basladı. Guttenberg jaǹalıǵın qabıl etken Angliyalı Uilyam Kokoston 1473-jılı birinchi reklamasın pechatlı baspa qaǵazda shıǵaradı. Bul pechatlanǵan qaǵazlarda diniy kitaplar xalıqqa tarqatılǵan edi.
Bunnan bir ásir aldınraq Atlantanıǹ Jorjiya shtatında Farmatsevt Jon Pemberton ónim jaratadı. Ol 1886-jılı qandayda bir ósimlik hám ǵozanıǹ mazasın beriwshi, qızǵısh reǹli, jaǵımlı dámli sirop jaratadı. Usı jılı 1-mayda Pembertonnıǹ eleksiri hár stakanı bes centden satıladı. Bunıǹ izi tabıslı bolıp, 29-mayda Atlantanıǹ “Djornl” gazetasında usı ishimlik úlken betlerde reklamaǵa shıǵadı. Qala xalqı bul ishimlikke úyrenedi. Bul házirgi daǹqı ketken “Coca-cola” edi. Áhmiyetlisi sonda, sol waqıtları da, házir de usı ishimlik reklaması tekstinde tómendegi sózler ushıraydı:

• 
  Sıpatlı ishimlik;
  
• 
  Alkogolsız, dámli hám ataqlı ishimlikler mámleketi;
  
• 
  Shóllew waqıt taǹlamaydı;
  
• 
  Amerika turmıs táriziniǹ ulıwmalıq tımsalı;
  
• 
  Jaz dawamındaǵı ájayıbat.
  

Reklamanıǹ barlıq túrleriniǹ ishinde házirgi waqıtta Internet reklama adamlarǵa eń úlken tásir kórsetedi. Siz gazetadaǵı reklamalardı oqıp shıǵıwıńız yamasa ápiwayı kóshe daǵazaların basıp ótiwińiz múmkin. Biz hámmemiz kúnine bir neshe saat Internette bolamız. Jańalıqlar, kewilli ilajlar, kórkem filmler menen bir qatarda túrli túrdegi reklamalardı kóremiz. Bunday reklama aǵımı insanǵa tásir etpewi múmkin emes. Reklama sanasız túrde insannıń qálew-tileklerin hám júris-turısların basqaradı, kóbinese reklama etiletuǵın tovarlardı anıq eslep qalamız hám belgili bir ónimdi satıp alıw tuwralı soraw tuwılsa, kóbinese biz Internette reklama etetuǵın zatlardı satıp alamız.