5 – Leksiya. Absorbciya prosessinin’ teoriyaliq tiykarlari ha’m texnologiуаliq esaрlari

Sherebeniń basım beriwshi rezervuarları. Bul arqalı sherebe absorbciya bólimine beriledi hám onda sherebeni tazalaw bólimi sherebe jetkerip beriwdi waqtınsha toqtatqan jaǵdaylarda paydalanıw ushın bazı-bir muǵdarda sherebe qorı saqlanadı.
Ammoniylastırılǵan sherebeni saqlaw ıdısı (SAR) absorbciya hám karbonizaciya bólimleriniń arasında bufer xızmetin atqarıp, olarǵa júklew muǵdarı waqıtsha ózgergende bul bólimlerdiń normal jumısın támiynleydi.
Tamshı uslaǵısh-separatorlar gazdi suyıqlıq tamshılarınan tazalaw ushın xızmet etedi. Gaz aǵımınıń baǵdarın birden ózgertiw menen bir waqıtta onıń tezligin páseytiw nátiyjesinde payda bolıwshı, inerciyalıq kúshlerdiń tásiri astında gazdiń tazalanıwı ámelge asadı.
Aǵımdı burǵan waqıtta gazdegi aralaspay turǵan suyıqlıq tamshıları, óziniń háreket baǵdarın inerciya boyınsha saqlap qalıwǵa umtılıp, separatordıń diywallarına urınadı hám gaz aǵımınan ajıraladı. Separatordıń dúzilis sxeması 42-súwrette kórsetilgen. Gaz separatorǵa qaptaldan 2-shtucer arqalı kiredi hám oraylıq truba 3 boylap shıǵadı. Suyıqlıq tamshıları diywallarda uslanıp, tómenge aǵıp 1-shtucer arqalı shıǵıp ketedi.

42-Súwret. Separator qurılısınıń sxeması: 1 – suyıqlıqtıń shıǵıwı, 2 – gazdiń kiriwi, 3 – gazdiń shıǵıwı.

Bazı-bir zavodlarda absorbciya bóliminde barbotajlı juwǵıshlardıń ornına skrubberli juwǵıshlar qollanıladı. Olar kolonna túrindegi úskeneler kórinisinde bolıp, shoyın cargalardan quralǵan hám ishi nasadkalar – keramikalıq kolcolar, aǵash reshetkalar h.t.b. menen toltırılǵan. Nasadka kózgenekli reshetkalarǵa jaylasqan. Úskeneniń joqarısında bólistiriwshi tarelka bolıp, onın járdeminde nasadka suyıqlıq penen teń ólshemli suwǵarıladı. Skrubberli úskenelerdiń barbotajlı úskenelerge salıstırǵanda ústinligi gazdiń ótiwi ushın qarsılıqtıń kemligi, qurılmanıń ápiwayılıǵı bolıp esaplanadı. Biraq bul úskenelerdi tazalaw hám ońlaw jumısları kóp miynet talap etedi.
PVFL hám PGKL-2 úskenelerinen atmosferaǵa zıyanlı shıǵındılardı (ammiakti) shıǵarıwdı kemeytiw ushın, atap ótilgen úskenelerdiń izine qosımsha qálegen dúzilistegi sanitariyalıq juwıwshı úskeneler ornatılǵan. Barbotajlı tarelkalardıń sanı (nasadkanıń biyikligi) ammiaktıń ruxsat etilgen muǵdarınan (PDK) – 20 mg/m³), kelip shıǵıp esapqa alǵan halda belgilenedi.