B. T. Musayev, K. R. Aliyeva, B. Narimanov O‘zbekiston respublikasining konstitutsiyaviy huquqi darslik toshkent – 2019

Mavzuni mustahkamlash uchun savollar

1. O'zbekiston Respublikasi Prezidentining vakolatlari nimalardan iborat?

2. O‘zbekiston Prezidentini saylash tartibi haqida gapirib bering.

3. O‘zbekiston Prezidentining qasamyodi mazmuni nimalarni o`zida aks ettiradi?

4. O‘zbekiston Respublikasi Prezidenti daxlsizligi haqida so`zlab bering.

XV mavzu. Mahalliy davlat hokimiyati asoslari. Fuqarolarning o‘zini o‘zi boshqarish organlari.

§ 1. Mahalliy davlat organlari tizimi
Konstitutsiyaga asosan mamlakatimizda mahalliy miqyosda ham ikki turdagi, ya'ni vakillik davlat hokimiyati va ijro hokimiyati organlari mavjud.

Yodda tuting!

Konstitutsiyaning 99-moddasiga binoan, “Viloyatlar, tumanlar va shaharlarda (tumanga bo‘ysunuvchi shaharlardan shuningdek shahar tarkibiga kiruvchi tumanlardan tashqari) hokimlar boshchilik qiladigan xalq deputatlari Kengashlari hokimiyatning vakillik organi bo‘lib, ular davlat va fuqarolarning manfaatlarini ko‘zlab o‘z vakolatlariga taalluqli masalalarni hal etadilar”.

Konstitutsiyaning 102-moddasida “Vakillik va ijro hokimiyatini tegishliligiga qarab hokimlar boshqaradi” degan qoida mahalliy miqyosda vakillik hokimiyati bilan birga ijro hokimiyatini ham o‘rnatilganligini ko‘rsatadi. Mazkur modda qoidalari yana qaysi ma'muriy hududlarda hokim qanday tartibda tayinlanishi haqida hamda ijro hokimiyatining tizimi haqida xulosa qilish imkoniyatini tug‘diradi.