Бухгалтерия ҳисобида ҳужжатлар ва ҳужжатлар айланиши тўғрисидаги Низом

Ҳужжатлар айланишини ташкиллаштириш
Ҳужжатлар айланиши — корхонанинг бухгалтерия ҳисобида ҳужжатларнинг – уларни тузиш ёки олиш, ҳисобга қабул қилиш ва ишлов бериш пайтидан бошлаб, эски ҳужжатларни архивга топширишгача бўлган даврдаги ҳаракати тартибидир.
Корхонада ҳужжатлар айланиши оқилона бўлишини (ижро этувчилар сони мақбул бўлиши, ҳужжатлар айланиши муддатларини) таъминлаш учун жадвал тузилади.
Ҳужжатлар айланиши жадвали корхона раҳбарининг буйруғи билан тасдиқланади. Ҳужжатлар айланишининг намунавий жадвали 1297-сон Низомнинг 3-сон иловасида келтирилган.

Корхона ходимлари ўз фаолият соҳасига тааллуқли бўлган ҳужжатларни тузишади ва тақдим этишади. Бунинг учун ҳар бир ижрочига жадвалдан кўчирма берилади. Кўчирмада ижрочининг фаолият соҳасига тегишли ҳужжатлар, уларни тақдим этиш муддатлари ва ушбу ҳужжатлар тақдим этиладиган корхона бўлинмалари кўрсатилади.
Ҳужжатлар айланиши жадвалига риоя қилиш учун жавобгарлик, ҳужжатларни ўз вақтида тузиш ҳамда бухгалтерия ҳисоби ва ҳисоботида акс эттириш учун уларни ўз вақтида тақдим этиш, ҳужжатлардаги мавжуд маълумотларнинг ишончлилиги ва улар тўғри расмийлаштирилганлиги бўйича жавобгарлик ушбу ҳужжатларни тузган ва имзолаган шахслар зиммасига юкланади.