Dasturning mazmuni

4- MAVZU: MA’MURIY AMALIYOTNING O’ZIGA XOS XUSUSIYATLARI.

REJA:

1. 
   Davlat soliq xizmati organlarida ma’muriy amaliyotni yuritishning o’ziga xos jihatlari.
   
2. 
   Bozorlar va savdo komplekslari faoliyatini nazorat qilish bo’limlari tomonidan ma’muriy amaliyotni yuritishning o’ziga xos xususiyatlari.
   

Tayanch so’z va iboralar: Ma’muriy amaliyotni tashkil etish bo’limining funksiyalari va huquqlari, ma’muriy amaliyotni tashkil etish, ma’muriy amaliyot ishini yurituvchi xodim.
1. Davlat soliq xizmati organlarida ma’muriy amaliyotni yuritishning o’ziga xos jixatlari.

Davlat soliq xizmati organlarining soliq to’g’risidagi qonunlarni qo’llash borasidagi faoliyati soliq intizomini mustahkamlashga, soliq to’g’risidagi qonun hujjatlariga qat’iy amal qilishga, soliqlar va boshqa majburiy to’lovlarni O’zbekiston Respublikasining davlat byudjetiga va davlat maqsadli jamg’armalariga to’liq va o’z vaqtida tushishini ta’minlashga, soliq haqidagi huquq buzilishlarining oldini olish va ularni bartaraf etishni ta’minlashga qaratiladi.

Soliq to’g’risidagi qonun hujjatlarining buzilishiga doir ma’muriy ishlarni ko’rib chiqish tartibi O’zbekiston Respublikasining Soliq kodeksi, Ma’muriy javobgarlik to’g’risidagi kodeksi (keyingi o’rinlarda MJTK deb yuritiladi), «Davlat soliq xizmati to’g’risida»gi Qonuni va boshqa qonun hujjatlari bilan belgilanadi.

Soliq to’g’risidagi qonun hujjatlarining buzilishiga doir ishlarni ko’rib chiqishdan maqsad har bir ishning tafsilotlarini o’z vaqtida, har tomonlama to’la va xolisona aniqlashdan, uni qonunlarga mos holda hal etishdan, chiqarilgan qarorning bajarilishini ta’minlashdan, shuningdek soliq to’g’risidagi qonun hujjatlarining buzilish sabablarini va unga olib boruvchi shart-sharoitlarni aniqlashdan, huquqbuzarliklarning oldini olishdan, fuqarolarni qonunlarga og’ishmay amal qilish ruhida tarbiyalashdan, qonuniylikni mustahkamlashdan iboratdir.

Soliq to’g’risidagi qonun hujjatlarining buzilishiga doir ishlar qonuniylikka qat’iy amal qilish asosida ko’rib chiqiladi. Soliq to’g’risidagi qonun hujjatlarining buzilishi uchun ta’sir choralarini qo’llash chog’ida qonun hujjatlari talablariga rioya etilishi vakolatli davlat soliq xizmatining yuqori turuvchi organlari, mansabdor shaxslari va prokurorning muntazam nazorati, shikoyat qilish huquqi va qonunlarda belgilangan boshqa usullar bilan ta’minlanadi.