Dasturning mazmuni

2.Ashyolar va hujjjatlarni olib qo’yish tarzida jazo choralarini qo’llash tartibi.

Ma’muriy javobgarlik to’g’risidagi kodeksning 23-moddasiga asosan ma’muriy huquqbuzarlikni sodir etish quroli hisoblangan yoki bevosita shunday narsa bo’lgan ashyoni haqini to’lash sharti bilan olib qo’yish va ma’muriy huquqbuzarlikni sodir etish quroli hisoblangan yoki bevosita shunday narsa bo’lgan ashyoni musodara qilish ma’muriy jazo chorasi turlaridan biridir.

Ashyolarni haqini to’lash sharti bilan olib qo’yish yoki musodara qilish ham asosiy, ham qo’shimcha ma’muriy jazo tariqasida, boshqa ma’muriy jazo choralari esa faqat asosiy jazo tariqasida qo’llanilishi mumkin.

Ma’muriy javobgarlik to’g’risidagi kodeksning 26-moddasiga asosan ashyolar va hujjatlarni haqini to’lash sharti bilan olib qo’yish tartibi quyidagichadir.

Ma’muriy huquqbuzarlikni sodir etish quroli hisoblangan yoki bevosita shunday narsa bo’lgan ashyoni haqini to’lash sharti bilan olib qo’yish shu ashyoni majburiy tarzda tortib olib, uni keyinchalik sotib yuborish hamda sotishdan tushgan pulni ashyoning sobiq egasiga tortib olingan ashyoni sotish xarajatlarini chegirib tashlagan holda topshirishdan iboratdir.

O’qotar qurollar va o’q-dorilarni haqini to’lash sharti bilan olib qo’yish asosiy tirikchilik manbai ovchilik bo’lgan shaxslarga nisbatan qo’llanilishi mumkin emas.

Ashyoni haqini to’lash sharti bilan olib qo’yish chorasini qo’llanish tartibi va tortib olinadigan ashyolarning turlari ma’muriy javobgarlik to’g’risidagi kodeks va O’zbekiston Respublikasining boshqa qonun hujjatlari bilan belgilab qo’yiladi.

Ma’muriy javobgarlik to’g’risidagi kodeksning 27-moddasiga asosan ashyolar va hujjatlarni musodara qilish tartibi keltirilgan.

Ma’muriy huquqbuzarlikni sodir etish quroli hisoblangan yoki bevosita shunday narsa bo’lgan ashyoni musodara qilish shu ashyoni haqini to’lamasdan majburiy tarzda davlat mulkiga o’tkazishdan iborat bo’lib, bu chora: tuman (shahar) sudining ma’muriy ishlar bo’yicha sudyasi tomonidan; bojxona organlari tomonidan — aksiz markalari qo’yilmagan tamaki mahsulotlari va alkogolli ichimliklarni O’zbekiston Respublikasi hududiga olib kirilganda, transportirovka (xalqaro tranzit bundan mustasno) qilinganda va saqlanganda, shuningdek eksport qilinishi man etilgan buyumlar va mahsulotlar O’zbekiston Respublikasi tashqarisiga olib chiqib ketilayotgan hollarda; soliq organlari, O’zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti va uning joylardagi bo’linmalari tomonidan — aksiz markalari qo’yilmagan tamaki mahsulotlari va alkogolli ichimliklar saqlanganda, realizatsiya qilinganda, shuningdek yashirin ravishda ishlab chiqarilganda. Basharti O’zbekiston Respublikasi qonunlarida boshqa qoida nazarda tutilmagan bo’lsa, faqat huquqbuzarning shaxsiy mulki bo’lgan ashyogina musodara qilinishi mumkin.

O’qotar qurollar va o’q-dorilarni, boshqa ov qurollarini musodara qilish asosiy tirikchilik manbai ovchilik bo’lgan shaxslarga nisbatan qo’llanilishi mumkin emas.

Musodara qilish chorasini qo’llanish tartibi ma’muriy javobgarlik to’g’risidagi kodeks va O’zbekiston Respublikasining boshqa qonun hujjatlari bilan belgilab qo’yiladi.