Diktant tu’rleri ha’m metodikasi

AYTIW DIKTANTI


Waqıt esabı
Waqıttı ko’riw, esitiw mu’mkin emes. Biraq waqıt bar na’rse. Waqıt hesh qashan toqtamay ha’reket etedi. Tek alg’a umtıladı.
Waqıt o’lshewlerin de bizge ta’biyattın’ o’zi bergen. Adamlar waqıttı ku’n menen tu’n arqalı o’lshegen. Yamasa aydın’ tu’rli ko’rinisleri menen shamalag’an. Jıl ma’wsimlerinin’ u’zliksiz almasıp turıwın baqlag’an.
Jer bir sutkada o’z og’ı a’tirapında bir ma’rte aylanadı. Quyash a’tirapın bolsa bir jılda aylanıp shıg’adı.


DO’RETIWSHILIK DIKTANT


Aymaq waqtı
Jer domalaq formada. Ol o’z og’ı a’tirapında Batıstan Shıg’ısqa qaray aylanadı. Ol o’z betinin’ tu’rli bo’limlerin izbe-iz quyash ta’repke burıp turadı. Ku’nnin’ shıg’ıwı jer sharının’ tu’rli jerlerinde tu’rli waqıtqa tuwra keledi. Ma’selen, Moskvada saat 10 bolsa, Tashkentte 12 boladı. A’ne usınday waqıt aymaq waqtı yamasa jergilikli waqıt dep ataladı.


TEKSERIW DIKTANTI


Da’rilik o’simlikler
Ba’ha’rde ha’r qıylı sho’pler menen qaplang’an qır-tegisliklerdi ko’rip ha’mmenin’ zeyni ashıladı.
Olardın’ atı sonshelli ko’p, sanap tamamlaw da qıyın.
A’diraspan, atqulaq, jag’-jag’ sıyaqlı sho’pler shıpalı o’simlikler.
Bul o’simliklerden demleme tayarlap ishsen’iz, denen’izge paydalı, ku’shin’izge ku’sh qosıladı. Olardı qısta paydalanıw ushın keptirip qoyıw kerek.


AYTIW DIKTANTI


Pal ha’rreleri
Pal ha’rreleri xojalıg’ımızg’a u’lken payda keltiredi. Pal ha’rreleri alma, erik, qulpınay gu’llerindegi shireni aladı. Olardan pal jıynaydı. Alıp kelgen shireni uyasına jıynaydı. Onı qanatları ja’rdeminde palg’a aylandıradı.
Pal ha’rreleri tatıw jasaydı. Ol miynetkesh boladı.
YADTAN JAZIW DIKTANTI

Tawda nege Eridi qar? Nege ılay bolıp Ag’ar japlar?

Nege gu’ller Ku’ldi ta’kirar? Sebebi ja’ne Keldi ba’ha’r.