Gara Seýitliýew Saýlanan eserler

192
ÝÜREGI OŇ ÝARAGY
«Hindiniň awçysy çyksa şikara
Başga aw islemez pil sesin aňsa».
Mollanepes
Pil awyna, şir awyna çykmaga,
Şir-peleňden batyr ýürek gerekdir.
Äpet pili sürüp barýar bir çaga,
Belki, oň ýüregi
Şeýle ýürekdir.
Çaga ýüregi däl onuň ýüregi,
Oň ýüregi Hindistanyň ýüregi.
Ynsansöýer ýürek — onuň ýaragy,
Şeýle ýarag bolsun
Hemmäň ýaragy!

---

193
HINDI SEN
Bäş müň ýyl içinde bäş million gaýdan
Belent ruh bilen çykan, hindi sen.
Tupanda güýç diläp güneşden, aýdan,
Dünýä umyt bilen bakan, hindi sen.
Hindi okeany — hindi ummany,
Döräpdir, doganym, döken ýaşyňdan.
Taryhyň — gaýtyly jebir dessany,
Okadym tupanlar geçen başyňdan.
Astyndan çykmaga jebir dagynyň,
Taryhyň böwedin açan, hindi sen.
Ýurduňda ýurtbasar iňlis baýdagnyň
Üstünden pil sürüp geçen, hindi sen.
Seni görmek boldy miýesser maňa,
Myhmanladyň meni bereket bilen.
Goý, bagt getirsin gelejek saňa.
Ýene bereket tap
Hereket bilen!

---

194
ERTIRIŇ
ŞAPAGYDYR
Polady mum edýär, doganym, seniň güýjüň,
Gara polat goluňda, gara çekiç saz edýär,
Gara gözelek gardaş, seniň işçi çekijiň
Eýsem bagt arzuwlap täzeçe owaz edýär.
Daň ýyldyznyň ýalkymy dek ýalkym saçýar uçgunyň,
Eýsem ol seň watanyň ertirniň şapagydyr.
Arzuwyň dek syçrap ganat açýar uçgunyň,
Bu kanundyr, garaňkyny, daň şapagy dagydar!
Orak ýasýan ekeniň öz daýhan doganlarňa,
Gaýduwsyz güýçden ýasa polatdan oragyňy.
Polat orak ýollaňda mähriban doganlarňa
Ýolla polat orak bilen polat dek ýüregiňi.
Polady mum edýär, doganym, seniň güýjüň,
Seniň polat goluňda, polat çekiç saz edýär.
Gara gözelek gardaş, seniň işçi çekijiň
Ýürek arzuwyň ýaly täzeçe owaz edýär.

---