Gara Seýitliýew Saýlanan eserler

220
OÝNAMLAR
Kaşmir daglarynda gezer jerenler.
Kaşmir çeşmelerni süzer jerenler.
Kaşmir gözeliniň belli halyny
Gözel taryp edip ýazar görenler.
Halky meşhur eder dünýäde hünär.
Dünýäde meşhurdyr kaşmirli zergär.
Kaşmir gözeliniň gülli şalyny
Söýgülime alyp geldim ýadygär.
Kaşmir daglarynda duman gezmesin.
Kaşmir gunçalarny duşman üzmesin.
Kaşmir gözeliniň öz ykbalyny 
Özi çözsün, özge hiç kes çözmesin. 
HINDI GYZY
Gülleriň içinde gara mahmal gül,
Aýry bark urarmyş aý yşygynda.
Güller dünýäsiniň bagşysy bilbil,
Ilki dil açanmyş şonuň gaşynda

---

221
Şol gözel rowaýat ýadyma düşdi,
Hindi gyzy, seni gören çagymda,
Gözel görküň şol gül bolup ýetişdi
Şahyr ýüregimiň güller bagynda.
Gülleriň şasyndan görk alan gözel,
Dura bilmez seni gören saýraman.
Yşkdan doly gara gözleň ne gözel!
Gözellik älemniň haly sen jenan!
Hindistanda ýyl aýlanýar ýaz bilen,
Hindi gyzy, ömrüň seniň ýaz bolsun.
Hindistanda ýaşaýarlar saz bilen,
Hindi gyzy, ömrüň seniň saz bolsun.
GÖZLERIMDE SAKLANSYN
(Garyp gyza)
Owadandan owadan gyzlar gördüm dünýäde,
Emma seniň ýüzüň dek nurly ýüzi görmedim.
Owadandan owadan gözler gördüm dünýäde,
Emma seniň gözleriň dek nurly gözi görmedim;
Emma senden hem garyp harly gyzy görmedim.

---

222
Ýörişiň messan-messan.
Her bakyşyň bir dessan.
Seni dünýä bagş eden
Gözel ülke Hindistan.
Seniň röwşen gözleriň gözlerime saklansyn.
«Gara saňa aşyk!» diýip, goý çaklansa, çaklansyn.
Garyplyk gaýyp bolýar gara gözüň görende,
Çit köýnekde tawus dek görünýärdiň, garyp gyz,
Şeýle çekdi şekiliň Gara özüň görende,
Durduň çaga laçyn dek gözlerime garap, gyz,
Hindistanyň şemaly zülpleriňi darap, gyz.
Ýörişiň messan-messan.
Her bakyşyň bir dessan.
Seni dünýä bagş eden
Gözel ülke Hindistan.
Seniň röwşen gözleriň gözlerime saklansyn.
«Gara saňa aşyk!» diýip, goý çaklansa, çaklansyn.

---