I. O’quv materiallari

I. O’QUV MATERIALLARI
1.1. MA’RUZA MATERIALLARI


1 – mavzu. BIOFIZIKA FANIGA MUQADDIMA. BIOLOGIK.JARAYONLAR TERMODINAMIKASI. OCHIQ SISTEMANING ENTROPIYASI. BIOLOGIK JARAYONLAR KINETIKASI

REJA:

1. 
   Biofizika predmetining mazmuni, tadqiqot obyektlari.
   
2. 
   Biofizikaning asosiy bo’limlari, uning shakllanishida boshqa fanlarning roli, ular bilan aloqasi.
   
3. 
   O’zbekistonda biofizikaning rivojlanishi.
   
4. 
   Termodinamikaning birinchi va ikkinchi qonuni.
   
5. 
   Entropiyaning ehtimolli xarakteri.
   
6. 
   Biologik jarayonlar kinetikasining nazariy asoslari. Gunberg-Vaage qoidasi.
   
7. 
   Kinetikada birinchi, ikkinchi, uchinchi va nolinchi tartibli reaksiyalar.
   
8. 
   Reaksiyalar tezligiga temperaturaning ta’siri
   

Tayanch iboralar:

Biofizika, biologik tizimlar, fizikaviy va fizik kimyoviy jarayonlar, elektrol mikroskop, spektroskop, elektrometrik o’lchash asboblari, EHM, rentgeno struktur analiz, ultrasentrifuga, matematika, fizika, elektrofiziologiya, meditsina biofizikasi.
Biofizika predmetining mazmuni, tadqiqot obyektlari. Biofizika umuman biologiya sohasining biologik sistemalarda kechadigan va ular faoliyati asosida yurutuvchi fizikaviy va fizik-kimyoviy jarayonlarni tekshiruvchi fundamental fanlarning biridir.
Biofizikaning asosiy prinsiplaridan biri - biologik qonunlarning fizik-kimyoviy, ayniqsa fizikaviy kimyoning umumiy qonuniyatlariga asoslanib, ularning o’ziga xos rivojlanishidan iborat ekanligini ta’kidlashdir. Bunday hol, biologik jarayonlarga chiziqli emas jarayonlar termodinamikasi mavqeidan qaraganda ravshan bo’lib qoladi.
Biofizika uzoq vaqtlar davomida, unga murakkab va yuqori sezgirlikka ega uskunalar, uslubiy yondashuvlar, bir qator hollarda esa fundamental nazariyalar taqdim etgan aniq fanlarning "iste’molchisi" bo’lib keldi. Yuqori darajada farqlay olish xossasiga ega elektrol mikroskop, spektroskopik va elektrometrik o’lchash asboblari, hisoblash texnikasining qudratli vositalari va boshqalar shular jumlasidandir. Biofizikaviy tadqiqotlarning rivojlanishi sanab o’tilgan o’sha metodlar texnikaviy imkoniyatlarning takomillashtirilishi hamda ularning biologik obyektlar xosliklariga moslashtirilishini talab etdi.