Joba: Ulıwma mağlıwmatlar

5-lekciya.
Kepserlew. Kepserlew quralları. Gaz kepserlew hám kepserlewdiń zamanagoy usılları.
JOBA:
1.Ulıwma mağlıwmatlar.
2.Elektr duga menen kepserlew.
3. Kepserlew metalı hám flyusler..
4. Metallardı kislorod penen qırqıw.
5. Kepserlewde qollanılatuğın ásbaplar.
6. Gaz jalınında kepserlew.
7. Kepserlew jalını.
Ulıwma mağlıwmatlar.
Kepserlew – birktirilip atırğan bólekler ortasında óz-ara atomlarınıń birigiwi, qısman yamasa ulıwma, qızdırılıp hám plastik deformaciyalap yamasa eki usıldı birgelikte qollap ajıralmaytuğın birikpe payda etiw processi. Kepserlewde biriktirilip atırğan bólekler ortasında qattı dene yamasa suyıqlıqlar atomı, ionlar hám molekulalar ushın xarakterli bolğan baylanıs ornatıladı. Elementar bóleksheler hám molekulalardıń baylanısı kovalentli, ionlı, molekulyar hám metallı boladı.
Kepserlewdiń suwıq halında hám diffuziyalı kepserlew usılları bar.
Suwıq halında kepserlew - bul metallardıń ajıralmas birikpesin alıwdıń eń ápiwayı jolı bolıp, bunda eki kepserlenip atırğan bóleklerdi qızdırmastan úlken júkleniw astında óz-ara deformaciyalaw bolıp esaplanadı.
Diffuziyalı kepserlew - basım astında kepserlew túrine kiredi, bunda biriktirilip atırğan betlerdegi diffuziyalı birigiwde uzaq waqıt joqarı temperaturada hám kúshsiz plastik deformaciyalanıp ámelge asırıladı.
Diffuziyalı kepserlew tómendegi 3 basqıshta ámelge asırıladı:
1.Betler arasında fizikalıq kontakt payda boladı.
2.Ximiyalıq baylanıs payda boladı.
3.Kontakt zonasında kólemli baylanıs payda boladı.
Úshinshi basqıshta metalldıń qayta kristallanıwı sádir boladı, yağnıy metalldı qızdırıw nátiyjesinde plastik deformaciya tásirinde bekkemlengen danalar qaytadan kristallanadı.
Elektr dugalı hám gazde kepserlewdiń tómendegi tiykarğı túrleri bar: ushpa-ush, múyeshli, tavrlı hám ústpe-úst.