Joba; Ulıwma maǵlıwmatlar

Plastifikaciyalawshı qosımshalar. Qurılıs rastvorları gerbish, awır, jeńil hám yacheykalı betonlar sıyaqlı gewek betlerge jayılǵanı ushın tezlik arada suwsızlanadı. Rastvornıń qulay jaylasıwshańlıǵın asırıw maqsetinde quramına mineral hám polimer zatlar tiykarında tayarlanǵan plastifikatorlar kiritiledi. Cement hám hák tiykarındaǵı rastvorlar quramına giltopırıq poroshogı yamasa onnan tayarlanǵan ılay botqası mineral plastifikatorlar sıpatında qosıladı. Mineral plastifikatorlar sıpatında trepel, gliej, diatomit, tuffit hám sol sıyaqlı gidravlikalıq poroshok zatlardan paydalanıw múmkin. Bunnan tısqarı qattı janılǵı kúlleri, domna shlakı poroshogı sıyaqlı shıǵındılar da mineral plastifikator sıpatında isletiledi.
Usı mineral plastifikatorlar rastvordıń qulay jaylasıwshańlıǵın asırıw menen birge suw uslawshılıq qásiyetin, suw hám ıǵal ortalıqlarǵa shıdamlılıǵın, suwıqqa shıdamlılıǵın asıradı.
Mineral qosımshalar quramında normadan artıq organikalıq aralaspalar, duz eritpeleri bolmaslıǵı kerek, keri jaǵdayda rastvordıń sapası páseyiwi hám sıbawshılıqda isletilgende reńi ózgeriwi múmkin.
Organikalıq sirtaktiv zatlar qurılıs rastvorın plastifikaciyalaw, hawa pufakchaleri kiritiw maqsetinde qosıladı. Plastifikatorlar sıpatında LST (lignosulfonat texnicheski) milonaft, kanifol sabını sıyaqlı zatlar baylanıstırıwshı massasına salıstırılǵanda 0,1-0,3% kiritiledi.
Házirgi waqıtta qurılıs rastvorı quramına superplastifikatorlar (massaǵa salıstırǵanda 1% ke shekem) hám gelpolimer zatlar qosıladı; S-3 sıyaqlı superplastifikatorlar rastvor qolay jaylasıwshańlıǵın keskin asıradı. Gelpolimerlerdiń bir gramm/moli 50-1000 gramm/molge shekem suw molekulaların waqıtsha (6-24 saatqa shekem) baylanıstırıw qásiyetine iye bolıp, baylanıstırıwshı massasına salıstırǵanda 0,1-0,3% qosılıwı rastvordıń suw uslawshılıq qásiyetin keskin asıradı.
Qurılıs rastvorı qısda isletilgende quramına qatıwın tezlestiriw hám suwdıń muzlaw temperaturasın tómenletiw maqsetinde kalciy xlorid, natriy xlorid, potash, natriy nitrat sıyaqlı zatlar qosıladı.