Joba; Ulıwma maǵlıwmatlar

Baylanıstırıwshı zatlar. Qurılıs rastvorların alıwda portlandcementten tısqarı shlaklı portlandcement, puccolanlı portlandcement, tómen markadaǵı (M200) cement hám ayrım jaǵdaylarda kishireymeytuǵın, keńeyiwshi cementler isletiliwi múmkin.
Joqarı markadaǵı cementlerdi qurılıs rastvorları (ásirese, tómen markadaǵı rastvor) alıwda isletiw rastvordıń suw uslawshılıq, qatlamlanıw sıyaqlı qásiyetlerin jamanlastıradı.
Rastvornıń texnologiyalıq qásiyetlerin jaqsılaw hám portlandcement sıyaqlı baylanıstırıwshılardı tejew maqsetinde eki hám úsh komponentli quramalı quramlı rastvorlar keń kólemde isletiledi.
Hawada qatıwshı hám gidravlikalıq hák qurılıs rastvorları alıwda hák qamırı yamasa hák súti kórinisinde qollanıladı.
Qurılıs gipsi ásirese imaratlardıń ishki hám sırtqı bezegi ushın rastvorlar hám quramalı rastvorlar tayarlawda qosımsha sıpatında isletiledi.
Mayda toltırǵısh. Awır qurılıs rastvorları ushın mayda toltırǵısh sıpatında kvarc qumları, dala shpatı qumları sıyaqlı tabiyiy qumlar, tıǵız taw jınısların maydalap tayarlanǵan jasalma qumlar isletiledi. Jeńil rastvorlar ushın keramzit, agloporit, perlit, vermikulit, shungizit, kamporit sıyaqlı gewek jasalma toltırǵıshlar tiykarındaǵı qumlar; pemza, tuf, shlaklar sıyaqlı jeńil taslardıń qumları isletiledi. Qum quramında iri danalar bolsa, onı álbette elekten ótkiziw kerek. Qum quramındaǵı eń iri danalar diametri 2 mm den aspawı kerek. Qurılıs rastvorsınıń markası M100 hám onnan joqarı bolsa, quramındaǵı shań, ılay aralaspaları muǵdarı 10% artıq bolmaslıǵı kerek. Rastvor markası M50 hám onnan tómen bolsa, buyırtpashı menen kelisilgen halda shań, ılay aralaspaları muǵdarı 20% ke shekem bolıwı múmkin. Qum quramında organikalıq aralaspalar normadan artıq bolmaslıǵı zárúr.
Suw. Qurılıs rastvorları tayarlawda ishimlik suwı jaramlı esaplanadı. Basqa suwlar isletilse, olar quramında kislota, ishqor, duz eritpeleri hám qaldıqları, uglevodorod birikpeleri hám t.b. rastvor baylanıstırıwshı zatı qatıwına zıyanlı tásir kórsetetuǵın aralaspalar bolmaslıǵı kerek.
Arnawlı imarat hám inshaatlar qurılısında suwdı distilyator úskenelerinen ótkizip, taza halda isletiw usınıs etiledi.