Joba; Ulıwma maǵlıwmatlar

Bekkemlik. Qatqan rastvordıń bekkemligi mineral baylanıstırıwshınıń aktivligine, suw-cement qatnasına, qatıw múddeti hám sharayatına baylanıslı boladı.
Rastvordıń qısılıwdaǵı bekkemligi (markası) ólshemleri 7,07x7,07x7,07 sm bolǵan kublar yamasa 4x4x16 sm balchkalardı standart usılda 28 sutka normal sharayatda saqlanǵannan keyin sınap anıqlanadı.
Cementli rastvordıń bekkemligin cementtiń aktivligi hám cement-suw qatnasına baylanıslılıǵı tómendegi formula járdeminde anıqlanadı:
R₂₈=0,4R_c(C/S-0,3)
Usı formula járdeminde bekkemlikti anıqlaw gewek buyımlar ústine jayılatuǵın cementli aralaspalarǵa tiyisli boladı.
Gerbish, beton hám basqa gewek materiallarǵa jayılatuǵın cementli rastvorlar bekkemligi cement-suw qatnasına baylanıslı bolmay, al tek cementtiń sarpına baylanıslı boladı hám tómendegi formula járdeminde anıqlanadı:
R₂₈=kR_c(C-0,05)+4
Keltirilgen formula cement-hákli aralaspalarǵa tiyisli: C-cement sarpı, t/m³ qumǵa salıstırǵanda; k koefficienti qumnıń sapasına baylanıslı: iri qum ushın-2,2, ortasha iriliktegi qum ushın-1,8 hám mayda qum ushın-1,4.
Cementli aralas rastvorlardıń bekkemligi rastvor quramına kiritiletuǵın hák yamasa giltopırıqtıń muǵdarına baylanıslı boladı.
Aralas rastvorlar bekkemligi hám plastifikaciyalawshı qosımshalar (hák, giltopırıq) muǵdarı ortasındaǵı ulıwma baylanıslılıq 17.2-súwretde keltirilgen. Keltirilgen grafiklerge muwapıq aralaspalar quramında mayda toltırǵıshtı kóbeytiriw bekkemliktiń páseyiwine alıp keledi.
Qurılıs rastvorları 28 sutkadaǵı qısılıwdaǵı bekkemlik shegarasına qaray tómendegi markalarǵa bólinedi: 4, 10, 25, 50, 75, 100, 150, 200 hám 300.
Normal sharayatda cementli rastvorlar bekkemligi beton sıyaqlı uzaq múddet dawamında artıp barıwı múmkin.
Cementli rastvorlar bekkemligi 7 sutka 40-50%, 14 sutka 60-70%, 28 sutka 100%, 90 sutka 130% markadaǵı bekkemlikke qaray artıp barıwı múmkin.
Imaratlardıń sırtqı diywallarına gerbish, tas teriwde cement-hákli hám cement-giltopırıqlı aralas 10, 25 hám 50 markadaǵı rastvorlar isletiledi. Imarat karnizleri, stolbaları, tereze hám esik ústindegi gerbish hám taslar teriwde 100 markadaǵı rastvor isletiledi.
Vibrogerbish panelleri tayarlawda 75, 100, 150 markadaǵı cementli hám shlakli cement tiykarındaǵı rastvorlar qollanıladı.
Jeńil betonnan tayarlanǵan paneller chokların jabıwda 50 markadan kem bolmaǵan, awır beton paneller ushın bolsa 100 markadan kem bolmaǵan cementli montaj rastvorları isletiledi.
Jer astı konstrukciyaların gerbish hám tasdan tiklewde, beton fundament blokların teriwde cement sarpı qumnıń muǵdarına qaray keminde 75-125 kg/m³ bolıwı kerek.
Joqarı ıǵallılıqtaǵı gruntlarda hám jer astı suwlarınan tómende jaylasqan imarat bólimlerinde teriw jumısların alıp barıwda aktiv mineral qosımshalı portlandcement yamasa shlaklı portlandcement (keminde 125 kg/m³ qumǵa salıstırǵanda) tiykarındaǵı qurılıs rastvorları isletiliwi kerek.
Ortalıq temperaturası tómenlese rastvorlar bekkemliginiń ósiw dárejeside kemeyedi. Tómen temperaturada rastvordıń bekkemligi 28 sutkada markadaǵıǵa salıstırǵanda 55-75% quraydı. Shlaklı hám puccolanlı cementler tiykarında tayarlanǵan rastvorlar 10⁰C dan tómen temperaturada isletilse bekkemliktiń ósiwi keskin tómenleydi hám temperatura 0⁰C dan páseygen rastvorda qatıw processi ámelde toqtaydı.
Qıs máwsiminde isletiletuǵın rastvorlardıń markası jazdaǵıǵa qaraǵanda bir dáreje joqarı alınadı (máselen, 75 ornına 100 marka).