Kadastr sohasida ayrim davlat xizmatlari ko‘rsatishning ma’muriy reglamentlarini tasdiqlash to‘g‘risida

2-bob. Davlat xizmatini ko‘rsatish tartibi
8. Ariza beruvchi ipotekani davlat ro‘yxatidan o‘tkazish uchun vakolatli organlar orqali o‘zi kelib murojaat etganda, vakolatli organ xodimi ariza beruvchi nomidan ushbu Reglamentga 2-ilovadagi shaklga muvofiq davlat xizmatidan foydalanish uchun so‘rovnomani elektron shaklda to‘ldiradi.
So‘rovnomaga ipoteka shartnomasi ilova qilinadi.
9. Davlat xizmatlarini ko‘rsatish uchun bazaviy hisoblash miqdorining 1,25 baravari miqdorida yig‘im undiriladi.
Davlat xizmatlari ko‘rsatilganda, yig‘im to‘langanligini tasdiqlash axborot-kommunikatsiya tizimlari orqali amalga oshiriladi.
10. Yig‘imlar summasi quyidagi tartibda taqsimlanadi:
a) davlat notarial idoralari orqali murojaat etganda:
10 foizi — O‘zbekiston Respublikasi Adliya vazirligi budjetdan tashqari jamg‘armasining shaxsiy hisobvarag‘iga;
qolgan mablag‘larning 80 foizi Markaz hisobvarag‘iga, 20 foizi tegishliligi bo‘yicha Qoraqalpog‘iston Respublikasi, viloyatlar va Toshkent shahar yer tuzish va ko‘chmas mulk kadastri davlat korxonalarining hisobvarag‘iga o‘tkaziladi;
b) tijorat banklari orqali murojaat etganda:
10 foizi — tijorat banklarning hisobvarag‘iga;
qolgan mablag‘larning 80 foizi Markaz hisobvarag‘iga, 20 foizi tegishliligi bo‘yicha Qoraqalpog‘iston Respublikasi, viloyatlar va Toshkent shahar yer tuzish va ko‘chmas mulk kadastri davlat korxonalarining hisobvarag‘iga o‘tkaziladi.
11. Ipoteka to‘g‘risidagi shartnomani davlat ro‘yxatidan o‘tkazish uchun belgilangan yig‘imni to‘lamaslik davlat xizmati ko‘rsatishni rad etish uchun asos hisoblanadi.
12. Ariza beruvchi davlat xizmatidan foydalanishdan uni ko‘rsatishning har qanday bosqichida bosh tortish huquqiga ega.
Ariza beruvchi davlat xizmatidan foydalanishdan bosh tortganda, uning so‘rovnomasi ko‘rilmasdan qoldiriladi. Bunda to‘langan yig‘im summasi qaytarilmaydi.
13. Zarur ma’lumotlar rasmiylashtirilgandan va so‘rovnomaga kiritilgandan so‘ng vakolatli organ uni o‘z ERIsi bilan tasdiqlaydi va Markazga yuboradi.
14. Quyidagilar ro‘yxatdan o‘tkazishni rad etish uchun asos bo‘ladi:
taqdim etgan hujjatlarda noto‘g‘ri yoki buzib ko‘rsatilgan ma’lumotlarning mavjudligi;
hujjatlarni lozim tarzda rasmiylashtirmay taqdim etish;
ko‘chmas mulkka bo‘lgan huquqning davlat ro‘yxatidan o‘tkazilmaganligi;
qonunda nazarda tutilgan boshqa cheklovlar.
Boshqa asoslarga ko‘ra, shu jumladan ro‘yxatdan o‘tkazish maqsadga muvofiq emas degan vaj bilan ro‘yxatdan o‘tkazishni rad etishga yo‘l qo‘yilmaydi.
Ariza beruvchi ro‘yxatdan o‘tkazish rad etilgan kundan boshlab bir oy mobaynida ipotekani ro‘yxatdan o‘tkazish uchun yig‘imni to‘lamasdan qayta murojaat qilish huquqiga ega.
15. Markaz so‘rovnoma kelib tushgandan so‘ng bir ish kuni mobaynida ipotekani davlat ro‘yxatidan o‘tkazadi, ko‘chmas mulk obyekti bo‘yicha ipoteka taqiqi qo‘yadi, QR-kod (shtrixli kod) qo‘yilgan reyestrdan ko‘chirmani elektron shaklda rasmiylashtiradi va tegishli vakolatli organga yuboradi.
16. Vakolatli organlar Reyestrdan ko‘chirma kelib tushgandan so‘ng real vaqt rejimida uni ariza beruvchining elektron manziliga yuboradi yoki talabgorni bu haqda axborot-kommunikatsiya tizimi orqali xabardor qiladi. Vakolatli organlar talabgorning so‘roviga ko‘ra, unga Reyestrdan ko‘chirmani elektron shaklda yoki qog‘oz shaklida berishi mumkin.