Kasbiy psixologiyada bilish jarayonlari reja

KASBIY PSIXOLOGIYADA BILISH JARAYONLARI
Reja:
1.Kasbiy faoliyat va bilish jarayonlari.
2 Rassom - dizayner tayyorlash bilan bog‘liq ta’lim va tarbiya jarayonida talabalarning bilish faoliyatlarini takomillashtirishning psixologik tamoyillari va shartlari
3.Diqqat va uning turlari.
4.Idrok .Tasviriy san’at asarlarida yaratishda idrokning ahamiyati
5.Xotiraning psixik jarayon sifatida o‘rganilishi.Xotiraning qonunlari

Inson tabiat, jamiyat, butun borliq bilan hamisha bog‘langan. U atrofini bilgani bois ham borliqda o‘zini qanday tutishni, anglashni va shunga mos harakat qilishni biladi. Umuman inson hayotida “bilish” tushunchasi “anglash” tushunchasi kabi doimo dolzarb hisoblanadi. Chunki biror narsani bilolmay qolgan odam o‘zini bir oz bo‘lsada, yomon his qiladi va tajanglashadi. Ana shu barcha bilishlarimizning asosida psixikamizning bilish jarayonlari va bilish qobiliyatlarimiz yotadi.

Professional kasb egasi, mutaxassis uchun bilim, malaka va ko‘nikmalar qanchalik zarur bo‘lsa, demak, bilishlarning asosida yotgan psixikadagi bilish jarayonlari shunchalik muhim va ahamiyatlidir. Kasbiy psixologiya o‘z navbatida professional faoliyatni professional bilimdonlik bilan uyg‘un tarzda qabul iqladi. Shuni ta’kidlash o‘rinliki, professional bilimdonlik – shaxs umumiy madaniyatining shunday jabhasiki, unga faqat kasbiga taalluqli bo‘lgan bilimlardan tashqari, shu bilimlarning hosil bo‘lish yo‘llari va malaka hamda ko‘nikmalarning takomillashuvini ta’minlovchi psixologik jarayonlar va holatlarni bilish ham kiradi. Demak, kasb-hunar egasi uchun nafaqat o‘zida, balki o‘zgalarda ham hosil bo‘ladigan bilimlarning manbalari va ularning psixikaning qaysi jarayonlariga bog‘liqligini bilish o‘ta zarurdir.
Bilish jarayonlari – bular shunday psixologik jarayonlarki, ular vositasida shaxs o‘zini o‘rab turgan atrof-muhitning ma’lum va eng muhim hususiyatlarini anglashga, tushunishga, ular ustida mulohaza yuritib, zarurlarini ongida muayyan muddat saqlashga, o‘z xulq – atvorining istiqbolini belgilashga imkon topadi. Ya’ni, bilish jarayonlari orqali biz butun olamni, o‘z o‘tmishimiz, hozirimiz va istiqbolimizni, o‘zimizni ongimizda aks ettiramiz va bilamiz. Bilish jarayonlariga sezgilar, idrok, xotira, tafakkur, diqqat va hayol protsesslari kiradi.