Laboratoriya ishi-4

6- tajriba. Fe²⁺ va Fe³⁺ kationlari orasidagi farqni aniqlash.
FeSO₄ va Fe₂(SO₄)₃ eritmalarining rangiga e’tibor bering. Ikkita probirka olib, birinchisiga FeSO₄ ning yangi tayyorlangan erit­masidan 1 ml solib, ustiga cho‘kma hosil bo‘lguncha NaOH eritmasidan tomchilab qo‘shing va aralashtiring. Ikkinchisiga esa Fe₂(SO₄)₃ eritmasidan 1 ml solib, cho‘kma hosil bo‘lgunicha tomchilatib NaOH eritmasidan qo‘shib aralashtiring. Hosil bo‘lgan cho‘kmalarning rangiga e’tibor berib, reaksiya tenglamalarini molekulyar va ionli shaklda yozing.
7- tajriba. Amfoter elektrolitlar.
a) probirkaga xrom (III) sulfat yoki xrom-kaliyli achchiqtosh KCr(SO₄)₂ eritmasidan 1 — 2 ml solib, unga cho‘kma hosil bo‘lgunicha suyultirilgan NaOH eritmasidan tomchilab qo‘shing. Hosil bo‘lgan cho‘kmani probirkaga teng bo‘lib, birinchisiga suyultirilgan H₂SO₄ eritmasidan, ikkinchisiga NaOH eritmasidan ko‘proq qo‘shing. Cho‘kma erishidan hosil bo‘lgan eritmalarning rangiga e’tibor bering. Reaksiya tenglamalarini molekulyar va ionli shaklda yozing;
b) alohida probirkalarga ZnSO₄ va Al₂(SO₄)₃ eritma­laridan 1 —2 ml dan olib, yuqoridagi tajribani takror­lang.
8- tajriba. Ionli reaksiyalar.
a) kam eriydigan asoslarni hosil qilish.
Тo‘rtta probirka olib, birinchisiga 5 — 7 tomchi FeCl₃ erit­masidan, ikkinchisiga CuSO₄ eritmasidan 5 — 7 tomchi, uchin­chisiga MgSO₄ eritmasidan 5 — 7 tomchi solib, har biriga cho‘kma hosil bo‘lgunicha suyultirilgan NaOH eritma­sidan tomchilab qo‘shing. Hosil bo‘lgan cho‘kmalarning rangiga e’tibor bering va reaksiya tenglamalarini molekulyar va ionli shaklda yozing;
b) kam eriydigan kislotalarni hosil qilish.
Alohida probirkalarga 5 — 7 tomchidan natriy silikat va ammoniy molibdinat (NH₄)₂ MoO₄ eritmalaridan solib, ularning har biriga tegishli kislotalarning cho‘kmalari hosil bo‘lguncha xlorid kislota tomchilatib qo‘shing. Reak­siya tenglamalarini molekulyar va ionli holda yozing;
d) kuchsiz asoslarni olish.
Alohida probirkaga 5 — 7 tomchi ammoniy xlorid va ammoniy sulfat eritmalaridan olib, har biriga bir necha tomchi o‘yuvchi natriy eritmasidan qo‘shib ozroq qizdiring. Hosil bo‘lgan gazni hididan aniqlab, NH₄OH hosil bo‘lish reaksiyasini molekulyar va ionli shaklda yozing. NH₄OH ning ammiak va suvga parchalanishini ko‘rsating.