Lekciya №11. Ximiyanı oqıtıwda máselelerden paydalanıw Reje

Ximiya boyınsha sıpatqa tiyisli máseleler. Sıpatqa tiyisli máselelerdiń tómendegi túrlerin keltiriw múmkin.

1. 
   Baqlanǵan xádiyselerdi túsindiriw. Ne sebepten KMnO₄ qızdırılǵanda ajıralıp shıǵatuǵın gaz shoq qılıp qızdırılǵan shópti jandırıp jiberedi? Ne sebepten Na₂SO₄ eritpesine bariy xlorid eritpesi qosılǵanda shókpe payda boladı?
   
2. 
   Anıq zatlardıń sıpatlaması. Xlorid kislota tómendegi zatlardıń qaysları menen reakciyaǵa kirisedi? Cink, altın, temir h.t.b.
   
3. 
   Zatlardı bilip alıw. Qaysı probirkada kislota, silti yamasa duz bar ekenligin anıqlań. Qaysı probirkada xlorid kislota, sulfat hám nitrat kislotaları bar ekenligin anıqlap, qorsetiń.
   
4. 
   Zatlardıń quramın sıpat tárepinen tiykarlap beriw. Ammoniy xlorid quramında ammoniy hám xlorid ionı bar ekenligin tiykarlap kórsetiń.
   
5. 
   Aralaspalar quramınan taza zatlardı ajıratıw. Kislorodtı uglerod (IV) oksidinen qanday ajıratıp tazalaw múmkin?
   
6. 
   Zatlardıń alınıwı. Natriy gidroksidin múmkin bolǵan usıllar menen alınıwın kórsetiń.
   

Sıpat máselelerine zatlardıń bir-birinen payda bolıwı da kiredi. Tómendegi ózgerislerdi ámelge asırıń:
Na → NaOH → NaCl → HCl → FeCl₂ → Fe(OH)₂ → Fe(OH)₃
Sıpat máseleleri ishinde ásbaplardı isletiwge tiyislileride bolıwı múmkin. Máselen, kislorod, vodorod, xlor, ammiak gazların jıynaw ushın qanday ásbaplardan paydalanıladı? Sıpat máseleleri awızeki, jazba hám eksperimental bolıwı múmkin.