Lisoniy tarjima

MASNAVIY


Xush buvad payg’omhoi Kirdikor,
K-o’ zi sar mo poy boshad poydor.


TARJIMA


Xush erur Allohning payg’omlari,
Kim erur poydor onlarning bari.


LISONIY TARJIMA

Haq ta’olo hazratlarining saodat belgisi boʻlgan payg’om va ishoratlari go’zaldir. Zero, bu ishorat boshdan-oyoq, ya’ni avvaldan-oxirigacha poydor — ustuvordir.

SHARH

Islom ahli - musulmonlar uchun bir talay Rabboniy ishorat va bashoratlar bor. Birinchisi aziymush sha’n Qur’ondir. Qur’on qadrini oddiy aql vositasida idrok etmoq mahol, biroq uning qudratli hukmlari ijrosiga jiddu jahd etganlarning qismati oliydir.

Aziymush sha’n Qur’onning har bir iborasi salomatlikning buyuk manba’i, har bir ma’nosi nihoyatda teran ummondir. Havoyi nafsni tark etib, shar’iy vazifalar ijrosiga kirishmoq hissining inson shuurida uyg’onishi muqarrar Rabboniy payg’omdir.


MASNAVIY____Xutbai_shohon_bigardad_v-on_kiyo,__Juz_kiyovu_xutbahoi_anbiyo.___TARJIMA'>MASNAVIY


Xutbai shohon bigardad v-on kiyo,
Juz kiyovu xutbahoi anbiyo.


TARJIMA


Shohlarning xutbasi oʻtgay, faqat
Anbiyolar xutbasi qolgay abad.


LISONIY TARJIMA

Shohlar zotiga maxsus bo’lgan xutbalari, azamat, rayosat va davlatlari vafotlari barobarida mubaddal bo’ladi, ya’ni unutiladi. Faqat anbiyolar azamat va xutbalari mubaddal bo’lmaydi, boqiy qoladi (sharh qilindi).

MASNAVIY


Z-on, ki po’shi podshohon az havost,
Bori nomi anbiyo az Kibriyost.
TARJIMA


Chunki, shohlar xil’ati yolgiz havo,
Anbiyoning bor-yo’g’i – Kibriyo.


LISONIY TARJIMA

Zero, shohlarning sha’n-shavkati xavo, ya’ni dunyoviy ahvoldandir. Anbiyoning butun yoʻl-yoʻrig’i Kibriyo, ya’ni Tangri ta’olodandir.

SHARH

Jahondor shohlar ham baqo olamiga rihlat aylagach, ularning zotiga maxsus boʻlgan narsalar izsiz yuk bo’lib ketadi. Eng buyuk podshohlardan qolsa toʻrt-besh ravoq, besh-olti maqbara, inshootlar qolishi ehtimol. Biroq ular ham yo zilzila yohud so’ngsiz jangu jadallar kasridan payhon bo’ladi. Ammo anbiyolar hikmati boqiydir. Hali farzandi bashardan biror kimsa men falon paygambardan-da aqlliroq yohud donoroqman, deb da’vo qilgan emas. Ammo bir-biridan chunon ham purzo’r hukmdorlar shu qadar ko’pki, ba’zan nahot yer ularning zug’umiga abadan dosh bera oladi, deb oʻylab qolasiz.