Бунда, сайлов комиссиясидан ахборот-коммуникация технологияларидан фойдаланган ҳолда тайёрланган баённоманинг нусхасини тақдим этишни талаб қилиш назарда тутилмаган.
65. Фуқаролар ёки блогерлар овоз бериш жараёнини тасвирга олиши, онлайн трансляция қилиши мумкинми?
Жавоб: Сайлов жараёнини кузатиш ҳуқуқини берувчи ҳужжат (мандат)га эга бўлган шахслар ва аккредитациядан ўтган оммавий ахборот воситалари вакиллари овоз беришнинг яширинлигини бузмасдан фото, видео, аудио ёзувларни амалга оширишлари мумкин. Қамоқда сақлаш ва озодликдан маҳрум этиш жойлари, ҳарбий қисмлар, даволаш муассасалари бундан мустасно ҳисобланади.
66. Сайлов кампанияси нима ва у ким томонидан эълон қилинади?
Жавоб: Сайлов кампанияси – бу сайловларга тайёргарлик кўриш ва уни ўтказиш бўйича тадбирлардан иборат жараён.
Ўзбекистон Республикаси Президенти сайлови бўйича сайлов кампанияси бошланганлиги Марказий сайлов комиссияси томонидан сайлов кунидан камида уч ой олдин, яъни 2021 йил 24 июлга қадар оммавий ахборот воситаларида эълон қилинади.
Сайлов кампанияси расмий эълон қилинган кундан бошланиб, сайлов натижалари эълон қилинган кунга қадар давом этади.
67. Сайловолди ташвиқот нима?
Жавоб: Сайловолди ташвиқоти – бу сайлов кампанияси даврида амалга ошириладиган ва сайловчиларни номзодни ёки сиёсий партияни ёқлаб овоз беришга ундашга қаратилган фаолият. Сайловолди ташвиқоти номзодларни рўйхатга олиш учун белгиланган охирги куннинг эртасидан, яъни 2021 йил 20 сентябрдан эътиборан бошланади ва овоз беришга бир кун қолганида (2021 йил 23 октябрь) тўхтатилади.
68. Қачон сайловолди ташвиқотига йўл қўйилмайди?
Жавоб: Сайловолди ташвиқотига сайлов куни ва овоз беришга бир кун қолганида, яъни 2021 йил 23 ва 24 октябрь кунлари йўл қўйилмайди.
69. Сайловолди ташвиқотида қандай ҳаракатлар тақиқланади?
Жавоб: Сайловолди ташвиқотини сайловчиларга бепул ёки имтиёзли шартларда товарлар бериш, хизматлар кўрсатиш (ахборот хизматларидан ташқари), шунингдек, пул маблағлари тўлаш билан қўшиб олиб бориш тақиқланади.
Do'stlaringiz bilan baham: |
