Мавзу: аммоний сульфат ишлаб чиқариш технологияси

Аммоний сульфат хоссалари

Аммоний сульфат (NН₄)₂SO₄ - рангсиз кристалл модда (зичлиги 1769 кг/м³) бўлиб, унинг таркибида 21,21% азот бўлади. 350⁰С дан юқори хароратда қиздирилганда аммиак ва сульфат кислотага парчаланади. 100°С да нордон туз ҳосил қилиш билан диссоцияланиш бошланади; (NН₄)₂SO₄ устидаги NН₃ нинг босими 205°С хароратда 0,067 кПа ни, 300°С да 6,772 кПа ни ташкил этади. Аммоний сульфат сувда яхши эрийди. У кристаллогидратлар ҳосил қилмайди ва унинг эрувчанлиги харорат ортиши билан сезиларли ўзгармайди. Аммоний сульфат гигроскопиклиги ва ёпишқоқлиги кам бўлган ўғит хисобланиб, уни ишлатишда қийинчилик туғдирмайди. Камчилиги —ўғитнинг таркибида азот миқдорининг озлиги ва физиологик кислоталилигининг юқорилигидадир. Унинг қўлланилиши натижасида тупроқда сульфат кислотасининг тўпланиши туфайли уни нейтраллаш учун даврий равишда охаклаш зарурати келиб чиқади.

Саноатда аммоний сульфат ишлаб чиқариш усулининг асосини сульфат кислотасини аммиак билан нейтраллаш ташкил этади. Бу мақсадда тош кўмирни кокслаш жараёнида ҳосил бўладиган газлар аралашмасидан ажратиб олинган аммиак гази ишлатилади. Кокс газини аммиак (ва шу билан бир вақтда пиридин асослари) дан тозалаш жараёни аммоний сульфат ишлаб чиқариш билан боғланган. Синтетик аммиакдан эса бошқа турдаги юқори концентрацияли азотли ўғитлар: аммиакли селитра, карбамид ишлаб чиқаришда фойдаланилади. Чет элларда, қисман аммоний сульфат, гипсни аммоний карбонат эритмаси билан қайта ишлаш натижасида конверсиялаб ишлаб чиқарилади. Бундан ташқари капролактам ишлаб чиқариш жараёнида ҳосил бўладиган оқава сувлардан ҳам аммоний сульфат ишлаб чиқариш усуллари ҳам мавжуддир.
Марказий Қизилқум фосфоритларидан ЭФК ишлаб чиқаришда хосил бўладиган фосфогипсдан (NН₄)₂SO₄ олиш технологияси Олмалиқ “Максам”да ишлаб чиқариш тажриба синовидан ўтказилди. Аммоний сульфат донадорланган ёки кристалл холатда ишлаб чиқарилади ва белгиланган Давлат стандартлари талабларига жавоб бериши лозим (9.1 — жадвал). Аммоний сульфат қоғоз полиэтилен қопларда ёки вагонларда ташилади.