Mavzu: manzarali gullar kasalliklari

Gullarning vertitsillyoz so‘lish (vertitsillyoz vilt) kasalligi 
Kasallikni fakultativ parazitlar, gifomitsetlar Verticillium dahliae va Verticillium albo-atrum 
qo‘zg‘atadi. Vertitsillyoz vilt bilan ko‘pincha qo‘qongul, kartoshkagul, chinnigul, shabbo‘y, 
gerbera, xrizantema va boshqalar zararlanadi. Kasallik belgilari boshqa ekinlardagiga o‘xshash – 
o‘simliklar so‘lib qoladi, zararlangan, ammo nobud bo‘lmagan o‘simliklarning gullari kichik 
bo‘lib qoladi. Kasal o‘simliklar poyasining pastki qismini kesib tekshirilsa, unda o‘tkazuvchi 
naychalar dog‘lanishini ko‘rish mumkin. Nam ob-havoda zararlangan a’zolar ustida 
zamburug‘ning mitseliysi va sporalash organlaridan tashkil topgan qo‘ng‘ir, baxmalsimon 
g‘ubor hosil bo‘ladi. 
Gullarning fuzarioz so‘lish (fuzarioz vilt) kasalligi Kasallikni fakultativ parazitlar, 
gifomitsetlar Fusarium oxysporum va Fusarium roseum qo‘zg‘atadi. Fuzarioz vilt bilan 
ko‘pincha qo‘qongul, kartoshkagul, chinnigul, shabbo‘y, xrizantema siklamen, ilongul, 
delfinium va boshqalar zararlanadi, ammo uning eng katta zarari qo‘qongul, chinnigul va 
siklamenda kuzatiladi. Zamburug‘ mitseliysi ildiz bo‘g‘zida o‘simlikning o‘tkazuvchi 
naychalariga kiradi, ularni ozuqa moddalari va suv o‘tmaydigan qilib qo‘yadi, o‘simlikni 
toksinlari bilan zaharlaydi, natijada o‘simlik so‘lib qoladi. Zararlangan o‘simliklar qo‘ng‘ir tus 
oladi, poyasi, ildiz bo‘g‘zi va ildizlari chirib ketadi va nobud bo‘ladi. Kasal o‘simliklar 
poyasining pastki qismini kesib tekshirilsa, unda o‘tkazuvchi naychalar dog‘lanishini ko‘rish 
mumkin. Zamburug‘ o‘simlik qoldiqlarida mitseliy va xlamidosporalari, tuproqda 
xlamidosporalari vositasida saqlanadi. Kasallik o‘ta xavfli, u ham issiqxonalarda, ham ochiq 
dalalarda katta zarar keltiradi. 

---

 
Nazorat savollari: 
1.Gullarning nixol kasalliklarini ayting? 
2.Barg kasalliklaridan qaysilarini bilasiz? 
3.Gulg‘unchaning eng xovfli kasalliklarni ayting?