Mening vatanim

МУХАММАД ЮСУФ

Менинг ҳам Ватаним жанглар гувоҳи,

Менинг ҳам тупроғим топталганда хор.
Менинг ҳам руҳимда аждодлар оҳи,
Менинг ҳам қонимда қилич занги бор.
Минорлар эмас бу-фалакка қасам,
Қасоскор боболар кетмишлар санчиб.
Мен тортган ғамни ҳам бир-бор санасам,
Ўлик Фиръанлар кетарлар сапчиб
Мана шу она замин, она Ватан,

**
Кеч куз эди, мен сени кўрдим,

Деразамдан боқарди биров.
У сен эдинг, о, деҳқон юртим,
Турар эдинг ялангтўш яёв.
-Ташқарида изиллар ёмғир,
Кир, бобожон, яйрагил бир оз.
Дединг:-Пахтам қолди-ку, ахир,
Йиғиштирай келмасдан аёз.
Кетдинг, умри маҳзаним маним,
Ўзбекистон, Ватаним маним.

***
Ўкинма, она юрт, ўкинма, халқим,

Десалар, дилингда зорларинг бордир.
Аслида, қўйнингга сирғалиб кириб
Заҳарлар сочгувчи морларинг бордир.
Ўтган йўлларингга ташласам назар,
Қайрилмас қанотли сорларинг бордир.
Сенга шум ғанимлар қазмасинлар чоҳ,
Ёв келса, атаган дорларинг бордир.
Бугун ёлғизман деб бошингни эгма,
Тегрангда дўст ила ёрларинг бордир.
Балли, истиқболга кўзни тикибсан,
Ахир ҳаққа муҳтож хорларинг бордир.
Оққан дарёларинг қайтадан оқсин,
Ҳали эримаган қорларинг бордир.
Сен санъат ўлкаси, шеър диёрисан,
Қанча чертилмаган торларинг бордир.
Уйғониш замонинг муборак бўлсин,
Азалий шиддатинг, орларинг бордир.
Мен митти ўғлингман, лекин юкингни
Кўтариб ўтгувчи норларинг бордир.

**
Кимдир шеър ёзади, ким кирар жангга,

Хизмат қилсам дейди ҳар ким Ватанга.
Бундан мурод недир, недир муддао?
Қуш ҳам ўз ошёнин асрар доимо.
Шу ватан қўйнида топдик то камол,
Унга чин садоқат-энг эзгу аъмол.
Аслида меҳр ҳам, мурувват ҳам шу,
Демак шонинг мангу, шавкатинг мангу.
Онадан оқ сутнинг ҳаққи сўралмас,
Ватан розиман, деб жавоб қилса бас!

***
Эй азиз юрт, Ҳуррият-даврон муборакдир сенга,

Ўзбекистон-беғубор осмон муборакдир сенга.
Неча юз йил сен курашдинг Мустақиллик они деб,
Сен ани топдинг, улуғ имкон муборакдир сенга.
Халқаро давлат бўлиб қўйдинг қадам, мардона бўл,
Бошлаган иқбол сари Сарбон муборакдир сенга.
****
Бош устингдан ўтди кўп замон,
Ўтди Будда, ўтди Зардушти.
Ҳар учраган нокасу нодон,
Она халқим, ёқангдан тутди.
Сени Чингиз ғазабга тўлиб,
Йўқотмоқчи бўлди дунёдан.
Жалолиддин самани бўлиб,
Сакраб ўтдинг Амударёдан.
Сенсан ўшал саманим маним,
Ўзбекистон, Ватаним маним.