Mening vatanim

MENING VATANIM

Onamga o’xshaydi mening Vatanim,

Onamday mehribon, onamday xoksor.
Holbuki, qizi bor, yingolmas g'anim,
Holbuki, o'gli bor chaqmoqdek shunqor.
Chunki dunyo ko'rgan, ko'rgisi kelmas,
Qushning inini ham buzgisi kelmas.
Zamin qanday ulug', zamin behudud,
Kimlar chumolidir, kimlar shilliqurt.
Bolam, buyurmasin o'zgaga, deydi
Hammaning o'ziga nasib etgan yurt.
Chunki dunyo ko'rgan, ko'rgisi kelmas,
Qushning inini ham buzgisi kelmas.
O'zi ham bilmaydi qay biri mashhur:
Bir o'gli Yassaviy, bir o'gli Temur.
Olis ufqlarga ko'z tikib tolg'in,
Mard bolsang uy qurma, deydi, davlat qur.
Chunki dunyo ko'rgan, ko'rgisi kelmas,
Qushning inini ham buzgisi kelmas.
Ajdod surishtirib loflar urmagan,
Onam panjasiga panja urmagan.
O'zining bolasin avaylab-asrab,
O'zgaga yomonlik ravo ko'rmagan.
Chunki dunyo ko'rgan, ko'rgisi kelmas,
Qushning inini ham buzgisi kelmas.
Muhammad Yusuf
***
ИҚРОР

Шоирлик мен учун асло орзумас,

Шу ҳам иш бўлдими йигит бошимга.
Ҳамма шоир зотин йиғса - арзимас
Онамни соғиниб тўккан ёшимга.
Ана, улар қилар булбулларга дўк:
«Эй куш, бу боғларнинг мен булбулиман!».
Шоирлар билан ҳеч ошнолигим йўқ,
Мен ёруғ дунёда кўнглим қулиман.
Аммо юрагимни қийнар бир азоб,
Қўй десам кўймайди, тутқазар қалам,
Мен кетмон сўрасам - - тутади рубоб,
Куйлайман жонимдан ўтганда алам.
Осмонга қарасам кўринар тупроқ,
Майсага термулиб ойни кўраман.
Бу қандай кўргилик, билмайман, ўртоқ,
Мен қачон далада буғдой ўраман!..
Шоирлик мен учун асло орзумас,
Шу ҳам иш бўлдими эркак бошимга.
Ҳамма шоир зотин йиғса - - арзимас
Уйимни соғиниб тўккан ёшимга.
Ана улар салқин хиёбонларда
Энтикиб ёзишар келажакка хат.
Оқибат ҳақида ҳайқиришар ва
Абдулла Орифни қилишар ғийбат...
Бўлди.
Шеър ёзмайман.
Мен энди одам,
Оддий одам бўлиб яшай бошлайман.
Кўнглимга ачиниб агар ёзсам ҳам,
Тувда ёзиб, тонгда ўтга ташлайман!
Муҳаммад Юсуф
***
ЎЗБЕК ЎҒЛИ

Икки дарё ўртаси – кенг дастурхон,

Туз тотгансан, тузлиғингни унутма.
Дастурхонни белбоғ қилиб ўстирган
Ўзбек ўғли, ўзлигингни унутма!

Садарайҳон букилгани – сўлгани,

Эр йигитнинг эгилгани – ўлгани.
Йўл бермагил душманларга кулгани,
Ўзбек ўғли, ўзлигингни унутма!

Ўзбек десам, жаранглаган тор келур,

Ундан олдин номус ила ор келур.
Бургут келур, лочин келур, сор келур,
Ўзбек ўғли, ўзлигингни унутма!

Унутмагил насабингни, зотингни,

Умид билан отанг қўйган отингни.
Асра эрта кунингни – зурёдингни,
Ўзбек ўғли, ўзлигингни унутма!

Бўшамасин зинҳор ёғоч бешигинг,

Қулф кўрмасин дарвозаю эшигинг.
Йиғилмасин супадаги тўшагинг,
Ўзбек ўғли, ўзлигингни унутма!

Кўпга келган кулфатларга чап берма,

Маҳмадана майналарга гап берма.
Кўнгил обод бўлсин, сиртга зеб берма,
Ўзбек ўғли, ўзлигингни унутма!

Ночор қолсанг нокас қўлини тутма,

Арслонсан-ку тулки йўлини тутма.
Ўзингдан ўзгадан марҳамат кутма,
Ўзбек ўғли, ўзлигингни унутма! 
Иқбол Мирзо
***