Meva-sabzavotlarni quritish texnologiyasi

Kuraga tayyorlash . Kuraga tayyorlashda o‘rikni terish, tashish, saqlash, sortlarga ajratish, yuvish, dudlash va boshqa texnologik tadbirlar turshak, qaysa tayyorlashdan farq qilmaydi.
Bu usulda quritish uchun yirik donali o‘riklar tanlanib, yuvilgandan keyin chizigidan ikkiga ajratib danagi olib tashlanadi. Meva pallachalari qaynoq suvda 1 soat tutilib, ichki tomonini ustga qaratib patnislarga terilib, har kilogramm mahsulot hisobiga 1,5-2 gramm oltingugurt hisobida 60-80 sekund davomida tutatiladi. Dudlangan meva patnisi bilan birga so‘kchaklarga olib quritiladi. Namining 2/3 qismi kamaygandan keyin o‘rik pallalari ag‘darib qo‘yiladi va taxminan namining 3/4 qismi qochgandan keyin patnislarni taxlarga taxlab ko‘yish lozim. Bu usulda quritilganda 18% namlik bilan 20-28 % quruq mahsulot olish mumkin. Jami quritish davri 10-15 kun davom etadi.
Olma va shaftolini quritish
Quritish asosan quyidagi usullarda o‘tkaziladi:
1. Oddiy usulda quritish, bunda mevaning po‘sti archilmaydi.
2. Fransuzcha usulda quritish, bunda mevaning po‘sti archilib, urug‘i olinadi. Bu usulda quritilganda mevalar terilgandan keyin sortlarga ajratiladi, yuviladi, to‘g‘raladi, po‘stidan ajratiladi, dudlanadi, quritilgandan keyin nami baravarlashtirilib, yashiklarga solinib saqlanadi.
Quritish uchun olmalar texnik pishish davrida yoki to‘liq texnik pishishdan 2-3 kun oldin yig‘ishtirib olinadi. Bu davrda navlariga qarab olma qanddorligi 8-16%, kislotaliligi 0,2-1% bo‘lishi kerak.
Quritishdan oldin sortlarga ajratilgan olmani yuvish mashinalarida yoki toza suv solingan vannalarda yuvib, turli mikroorganizmlardan, chang va iflosliklardan tozalanadi.
Olma po‘sti archilgandan keyin to‘g‘ralib 2-3% li namakobga solinadi. Bu esa, uning tabiiy rangini o‘zgarmasligiga yordam beradi. Keyin patnislarga olinib oltingugurt bilan dudlanadi yoki oltingugurtli angidrid eritmasida dorilanadi. Dudlashda har 1 kilogramm olma uchun 1,5-2 grammdan oltingugurt sarflanadi. Dudlash 25-40 minut davom etishi lozim. Buning o‘rniga 0,1-0,2% li sulfat angidrid eritmasi bilan 1-2 minut ishlov berish ham mumkin.
Quritish usuli, havo harorati, olmaning yirik-maydaligiga qarab quritish 3-5 kundan 14-15 kungacha davom etishi mumkin. Po‘stidan tozalab quritilganda 12-15% gacha, tozalanganda 17-20% gacha olma qoqi olinib, qanddorligi 43-62. kislotaliligi 1-4% gacha bo‘lishi mumkin. Quritilgan mahsulot tarkibidagi namlik 20% dan oshmasligi lozim. Bu namlikda qoqi elastik, ezganda ushalmaydigan bo‘ladi. Tayyor mahsulotni 10-15 kun yashiklarga solib saqlangandan keyin, ya’ni namligi baravarlashgandan so‘ng sotuvga chiqarish mumkin.