Обложка и титульный лист текст научн док., 0

1.3. Elektr apparatlar sexining sex va xo`jaliklari tarkibi, ular bajaradigan ishlar.
Elektr apparatlar sexi elektr apparatlari va asboblar, yordamchi elektr mashinalari, lokomotiv elektr zanjirlarini ta’mirlash, lokomotivlarni yig‘ishda elektr sxemasi va elektr apparaturalarni o‘rnatish uchun mo‘ljallangan. Yordamchi elektr mashinalarni (asosan kichik yordamchi agregatlar elektr motorlarini) elektr apparatlar sexida ta’mirlash maqsadga muvofiq, bu elektr mashinalar sexida ta’mirlanadigan mahsulot nomenklaturasini kamaytirish va shu orqali sex ishchilarini butun e’tiborini lokomotivlarning asosiy elektr mashinalari – tortuv generatorlari, tortuv elektr motorlari va ikki mashinali agregatlarni ta’mirlashga qaratish imkonini beradi. Elektr appartlar sexida ta’mirlanadigan elektr apparatlar nomenklaturasi katta bo‘lganligi sababli sexda yordamchi elektr mashinalarni ta’mirlash sexdagi ishlab chiqarish xarakterini o‘zgartirmaydi.
Elektr apparatlar sexida ta’mir jarayoni ta’mirlash-o‘rnatish ishlari muddatlari va tartibini, shuningdek tayyor uzel va agregatlarni tegishli sexlarga uzatish vaqtini belgilovchi tarmoq grafiklari asosida tashkil etiladi. Tarmoq grafiklari apparatlar va mashinalarni ta’mirda turish va ularni lokomotivga o‘rnatish vaqtlarini aniqlaydi.
Ta’mirlangan yordamchi elektr mashinalari zavod grafigi bilan belgilangan muddatlarda tegishli sexlarga uzatiladi: moy bosimini orttirish nasoslari, yoqilg‘i bosimini orttirish nasoslari motorlari dizel sexiga; taxogeneratorlar, qayta o‘zgartirgichlar, kuzov ventilyatori motorlari lokomotivlarni yig‘ish sexiga; isitish qozoni motori aravachalar sexiga. Ixtisoslashtirish maqsadida elektr apparatlar sexida qator uchastkalar tashkil etilgan: yordamchi elektr mashinalari, elektr apparatlari, lokomotivlar zanjirlarini o‘rnatish.
Yordamchi elektr mashinalarni ta’mirlash uchastkasida detallarni qismlarga ajratish va yuvish, nosozliklarini aniqlash, ta’mirlash va stendda sinash ishlari bajariladi. Uchastkadagi ish joylari alohida mashinalarni qismlarga ajratish, ta’mirlash, yakor chulg‘amlarini qayta o‘rash operatsiyalari bo‘yicha ixtisoslashtirilgan. Mashinalarni ta’mirlash, yig‘ish va sinash texnologik jarayonlarini bajarish uchun uchastkada quyidagi jihozlar o‘rnatilgan: elektr pechi, qutb chulg‘amlarini o‘rash stanogi, gidravlik presslar, bo‘yash kamerasi, kavshar eritish uchun tigel, kollektorlarni ta’mirlash qurilmalari, yordamchi mashinalarni sinash stendi.
Yordamchi elektr mashinalarni lokomotivlarni yig‘ish sexi oqimli-konveyer liniyasining qismlarga ajaratish pozitsiyalaridan elektr apparatlar sexiga uzatish maxsus idishlarda jamlanishi bo‘yicha amalga oshiriladi. Ta’mirlangan yordamchi elektr mashinalarni dizel, lokomotivlarni yig‘ish va aravachalar sexlariga qaytarilishi xam jamlanishi bo‘yicha konteyner-stellajlarda bajariladi.