Odatingni tark etma, navro`Z

1-suxandon:

Marhamat, do‘stlar, navbat Navro‘z qo‘shiqlariga!

Nodira:

Dehqon dala aylandi,

Ho‘kiz shoxi moylandi.

Omoch, mola, cho‘nqa tish.

Dehqonbobo shaylandi.

Um uf, jaqala, um uf, jaqala.

Mardona:

Arpa-bug‘doy sepilsin,

Maysa unib yetilsin,

Dehqon ishi o‘ng kelsin,

Omborlarga don to‘lsin.

Yangi yil qutli bo‘lsin,

Qozonlar sutli bo‘lsin.

Um uf, jaqala, um uf, jaqala

Farida:

Bugun bayram – yilboshi,

Yilboshiga el oshi.

Har ro‘zg‘orning himmati.

Palovmi yo sut oshi,

Um uf, jaqala, um uf, jaqala.

Suhrob:

Qattiq oshi, sut oshi,

Qo’noq bo‘tqa, so‘k oshi.

Shovla pishgan ilikday

Kichirining zo‘r moshi

Um uf, jaqala, um uf, jaqala.

Bunyod:

Ochligimiz yo‘q bo‘lsin,

Momo, qorin to‘q bo‘lsin,

Rizqimiz butun bo‘lsin,

Umrimiz uzun bo‘lsin.

Um uf, jaqala, um uf, jaqala.

Ulug‘bek:

Tog‘da bulbul sayraydi,

Tol bag‘rini chaynaydi.

Shu ukamdan so‘rsangiz,

Qo‘zichoqday sakraydi.

Um uf, jaqala, um uf, jaqala.

Ulug‘bek:

Omad bizga jo‘r bo‘lsin,

Noz-u ne’mat ko‘p bo‘lsin.

Baxtimizga tinch zamon,

Davr-u davron zo‘r bo‘lsin-

Um uf, jaqala, um uf, jaqala.

Bunyod:

Gul lolalar ochilsin,

El-u yurtga sochilsin.

Doim tinch zamon bo‘lsin,

El-u yurt omon bo‘lsin.

Um uf, jaqala, um uf, jaqala.