O‘quv yilida umumiy o‘rta ta’lim muassasalarida “Yangi O‘zbekistonda erkin va farovon yashaylik!” shiori ostida tashkil etiladigan “Birinchi qo‘ng‘iroq” tadbirlarini o‘tkazish bo‘yicha tavsiyalar

Yangi O‘zbekistonda erkin va farovon yashaylik!”


(Umumta’lim maktablari uchun “Birinchi qo‘ng‘iroq” tadbirining namunaviy ssenariysi)

“Birinchi qo‘ng‘iroq” tadbiri ta’lim muassasasining rahbari boshchiligida, ma’naviy-ma’rifiy ishlar bo‘yicha direktor o‘rinbosari, o‘qituvchi-murabbiylar, yoshlar yetakchisi tomonidan rejalashtiriladi va namunaviy ssenariy asosida maktab ssenariysi ishlab chiqilib tasdiqlanadi.

Tadbir ishtirokchilari (2 nafar boshlovchi va ishtirokchi o‘quvchilar) Vatanni madh etuvchi qo‘shiq yoki musiqa sadolari ostida sahnaga tashrif buyurishadi.
1-boshlovchi: Assalomu alaykum mehri daryo ustozlar va qadrli mehmonlar!
2-boshlovchi:Assalomu alaykum aziz o‘quvchilar. Sizlarni mustaqilligimizning 30 yilligi hamda yangi o‘quv yilining boshlanishi darakchisi bo‘lgan “Birinchi qo‘ng‘iroq” bilan chin dildan tabriklaymiz.

1-boshlovchi: Assalom ona yurt tonglar o‘lkasi

Ta’rif, tavsifingning yo‘q nihoyasi.

2-boshlovchi: Senga bag‘ishlanur muqqaddas qo‘shiq

Bu o‘zbek elining o‘z madhiyasi.

(So‘ng O‘zbekiston Respublikasining davlat madhiyasi yangraydi.)

1-boshlovchi: Azizlar tadbirni ochib berish uchun so‘zni maktabimiz direktori _____________________ga beramiz. Marhamat.

(Maktab direktorining kirish so‘zi va bayram tabrigi – 5 minutgacha)

2-boshlovchi: Bu dunyoda jannatmonand yerlar bisyor,

Bu dunyoda oqu qaro ellar bisyor,
Ammo yo‘qdir bu dunyoda sendek diyor,
Jonim ichra jonimdursan, O‘zbekiston.
Tuprog‘ingda ajdodlarim izi qolgan,
Bobolarim terlarining tuzi qolgan,
Har gardida momolarim ko‘zi qolgan
Jonim ichra jonimdursan, O‘zbekiston.

1-boshlovchi: Xa, haqiqatdan ham, shoirlarimiz Vatan haqida qancha qasida, she’r, dostonlar bitmasin bari kamdir. Serquyosh Vatanimizning yeri oltin, havosi beg‘ubor, xalqi ulug‘vordir. Shu sababli tuprog‘i serxosil, mevalari shirindan shakardir.

2-boshlovchi: Yurtimiz 1991-yil 31-avgustda o‘zining mustaqil davlat ekanligini e’lon qildi va 1-sentabr “Mustaqillik kuni” deb e’tirof etildi.
Yurtimiz mustaqillikka erishgandan so‘ng biz o‘zligimizni, qadriyatlarimizni, ma’naviyatimizni teran anglay boshladik. O‘zbek nomining shoni-shavkati, g‘ururi dunyoga tanildi.

(Boshlang‘ich sinf o‘quvchilari tomonidan Vatan mustaqilligini tarannum etuvchi she’rlar o‘qiladi)

1-boshlovchi: Muxtaram Prezidentimiz Shavkat Mirziyoyev tomonidan

2021-yil “Yoshlarni qo‘llab-quvvatlash va aholi salomatligini mustahkamlash yili” deb e’lon qilindi. Yurtboshimiz rahbarligida mamlakatimizda yaratilayotgan imkoniyatlar tufayli bugungi kunning yoshlari xar jabxada, xususan, xalqaro sport musobaqalari, fan olimpiadalarida, musiqa va san’at tanlovlarida sovrinli o‘rinlarni egallamoqdalar, o‘zlari istagan oliygohlarning talabalariga aylanishmoqda.
Sharq donishmandlari aytganidek, “Eng katta boylik – bu aql-zakovat va ilm, Eng katta meros – bu yaxshi tarbiya, Eng katta qashshoqlik – bu bilimsizlikdir!”


2-boshlovchi: Zamonaviy O‘zbekistonda bugungi kunda ulug‘ allomalar - Mirzo Ulug‘bek va Muso Xorazmiy nomidagi iqtidorli bolalar maktablari, atoqli adiblarimiz - Hamid Olimjon va Zulfiya, Erkin Voxidov, Abdulla Oripov, Ibroyim Yusupov, Ibrat, Muxammad Yusuf, Xalima Xudoyberdieva nomlari bilan atalgan ijod maktablari, “Temurbeklar maktabi”, Prezident maktablari, xususiy maktablar singari mutlaqo yangicha mazmun va shaklga ega bulgan ta’lim muassasalari ham barpo etilmoqda.
Shu sababli, hammamiz uchun zamonaviy bilimlarni o‘zlashtirish, chinakam ma’rifat va yuksak madaniyat egasi bo‘lish, uzluksiz hayotiy ehtiyojga aylanishi kerak.

(Yuqori sinf o‘quvchilari ijrosida bitta qo‘shiq va bitta raqs ijro etiladi)

1-boshlovchi: Hozir navbatni yangi o‘quv yilida maktabga dastlabki qadamini qo‘yayotgan 1-sinf o‘quvchilarimiz hamda bitiruvchilarimizni tabriklash uchun so‘zni (mahalla qo‘mitasi, ota-onalar va huquqni muhofaza qilish idoralari vakillari)ga beramiz, marhamat.

1. 
   ____________________
   
2. 
   ____________________
   

2-boshlovchi: Mana tadbirimiz ham o‘z nihoyasiga yetib bormoqda. Barchangizni maktab qo‘ng‘irog‘i sadolari ostida 2021-2022 o‘quv yilining birinchi darsiga chorlab qolamiz. Aziz o‘quvchilar sizlarga yangi o‘quv yilini a’lo baholarga o‘qib, Vatanimizning yanada rivojlanishi uchun o‘z xissasini qo‘shadigan dono farzandlar bo‘lib yetishingizni tilab qolamiz.

(Shundan so‘ng birinchi qo‘ng‘iroq chalinadi. Qo‘ng‘iroq chalinib bo‘lgandan so‘ng S.Nazarxonning “Ulug‘imsan Vatanim” qo‘shig‘i ostida o‘quvchilar o‘z sinf xonalariga sinf rahbarlari boshchiligida kuzatiladi)

E’tiboringiz uchun raxmat!

(Ssenariyga ijodiy yondashgan holda o‘zgartirishlar kiritish mumkin)