O‘zbekiston respublikasining budjet kodeksi umumiy qism I bo‘lim. Umumiy qoidalar 1-bob. Asosiy qoidalar

182-modda. Davlat moliyaviy nazoratini o‘tkazish davriyligi va muddatlari
Yakuniy nazorat tarzidagi davlat moliyaviy nazorati ushbu Kodeksning 170-moddasiga muvofiq tasdiqlangan moliyaviy nazorat obyektlarini nazorat qilish rejasiga ko‘ra yiliga ko‘pi bilan bir marta amalga oshiriladi.
Yakuniy nazorat tarzidagi davlat moliyaviy nazoratini amalga oshirish muddati o‘ttiz kalendar kundan oshmasligi lozim. Zarur hollarda yakuniy nazorat tarzidagi davlat moliyaviy nazoratini amalga oshirish muddati davlat moliyaviy nazoratini tayinlagan tegishli davlat moliyaviy nazorat organining rahbari yoki u vakolat bergan shaxs tomonidan uzaytirilishi mumkin.
183-modda. Davlat moliyaviy nazorati natijalari bo‘yicha rasmiylashtiriladigan hujjatlar
Yakuniy nazorat tarzidagi davlat moliyaviy nazoratining natijalari davlat moliyaviy nazorat organining mansabdor shaxsi tomonidan:
tekshirish va taftish natijalari bo‘yicha tuziladigan hujjat — dalolatnoma;
davlat moliyaviy nazorati natijalarini umumlashtiruvchi hujjat — jamlanma dalolatnoma;
o‘rganish va nazorat tartibida tekshirish natijalari bo‘yicha tuziladigan hujjat — ma’lumotnoma yoki xulosa;
O‘zbekiston Respublikasi Hisob palatasi tomonidan davlat moliyaviy nazorati natijalari bo‘yicha tuziladigan hujjat — hisobot tarzida rasmiylashtiriladi.
184-modda. Davlat moliyaviy nazorati natijalarini rasmiylashtirish
Yakuniy nazorat tarzidagi davlat moliyaviy nazorati natijalariga doir hujjatlar quyidagilar ko‘rsatilgan holda rasmiylashtiriladi:
rasmiylashtirilayotgan hujjatning turi;
tekshirish o‘tkazilgan joy, hujjat tuzilgan sana;
davlat moliyaviy nazoratini o‘tkazish uchun asos;
davlat moliyaviy nazoratining turi va uni o‘tkazish davri;
davlat moliyaviy nazoratini o‘tkazgan mansabdor shaxslarning familiyasi, ismi va otasining ismi;
moliyaviy nazorat obyektining to‘liq nomi, nazorat bilan qamrab olingan davr uchun mas’ul mansabdor shaxslarning lavozimi, familiyasi, ismi va otasining ismi ular egallab turgan lavozimlarida ishlagan davr albatta ko‘rsatilgan holda;
moliyaviy nazorat obyektining joylashgan yeri (pochta manzili), bank rekvizitlari;
oldingi taftish (tekshirish) natijalari yuzasidan ko‘rilgan chora-tadbirlar haqidagi ma’lumotlar;
davlat moliyaviy nazorati bilan qamrab olingan davr hamda uni o‘tkazish uchun moliyaviy nazorat obyekti tomonidan taqdim etilgan hujjatlar haqidagi umumiy ma’lumotlar;
taftish (tekshirish) jarayonida aniqlangan qoidabuzarliklar faktlari, normalari buzilgan qonun hujjatlari ko‘rsatilgan holda.
Yakuniy nazorat tarzidagi davlat moliyaviy nazorati natijalariga doir hujjatga davlat moliyaviy nazoratini o‘tkazish uchun asos bo‘lib xizmat qilgan hujjatlarning ko‘chirma nusxalari, davlat moliyaviy nazorati doirasida harakatlarni bajarish to‘g‘risidagi bayonnomalar, inventarizatsiya dalolatnomalari, jalb etilgan ekspertlar va mutaxassislarning xulosalari, nazoratni o‘tkazish jarayonida davlat moliyaviy nazoratini amalga oshiruvchi mansabdor shaxslarning so‘roviga ko‘ra olingan materiallar, shuningdek nazorat doirasida bajarilgan harakatlarni tasdiqlovchi boshqa hujjatlar qo‘shib qo‘yilishi lozim.
Davlat moliyaviy nazorati natijalariga doir hujjatga qonun hujjatlari bilan, hujjatlar bilan yoki moliyaviy nazorat obyekti faoliyatining davlat moliyaviy nazorati jarayonida amalga oshirilgan tartib-taomillar natijalari bilan tasdiqlanmagan turli xil xulosalarni, taxminlarni va faktlarni, tergov materiallaridan ma’lumotlarni va moliyaviy nazorat obyekti mansabdor shaxslari tergov organlariga bergan ko‘rsatuvlarga havolalarni kiritishga yo‘l qo‘yilmaydi.
Davlat moliyaviy nazorati natijalariga doir hujjatda moliyaviy nazorat obyektining mansabdor va moddiy javobgar shaxslari harakatlariga huquqiy baho berilmasligi, shuningdek ularning qilmishlari, niyatlari va maqsadlari tavsiflanmasligi lozim.
Ushbu moddaning birinchi qismida nazarda tutilgan ma’lumotlar ma’lumotnoma (xulosa) rasmiylashtirilayotganda majburiy emas.
Davlat moliyaviy nazoratining natijalariga doir hujjatlar davlat moliyaviy nazoratini o‘tkazgan mansabdor shaxslar, shuningdek moliyaviy nazorat obyektining mansabdor va mas’ul shaxslari tomonidan imzolanadi.
Moliyaviy nazorat obyektining mansabdor va mas’ul shaxslari davlat moliyaviy nazorati natijalariga rozi bo‘lmagan taqdirda, hujjatni o‘z e’tirozlari bilan imzolaydi hamda o‘n kunlik muddat ichida e’tirozlarini davlat moliyaviy nazorat organiga yozma shaklda taqdim etadi.
Moliyaviy nazorat obyekti tomonidan e’tirozlar o‘n kunlik muddatda yozma shaklda taqdim etilmagan taqdirda, davlat moliyaviy nazorati natijalariga doir hujjat moliyaviy nazorat obyekti tomonidan qabul qilingan deb hisoblanadi hamda davlat moliyaviy nazorat organi tomonidan uni amalga oshirish choralari ko‘riladi.
Moliyaviy nazorat obyekti sudga murojaat etgan taqdirda, o‘zining sudga murojaat etganligini tasdiqlovchi hujjatni o‘n kunlik muddatda davlat moliyaviy nazorat organiga taqdim etishi shart. Sud tomonidan moliyaviy nazorat obyektining murojaati xususida qaror qabul qilinguniga qadar davlat moliyaviy nazorat organi davlat moliyaviy nazorati natijalari bo‘yicha rasmiylashtirilgan hujjatning nizoli bandlarga tegishli qismi bo‘yicha amalga oshirilishini to‘xtatib turadi.
Davlat moliyaviy nazorati natijalariga doir hujjatlarda bayon etilgan ma’lumotlarning ishonchliligi, xolisligi va to‘liqligi davlat moliyaviy nazorat organlarining mansabdor shaxslari tomonidan ta’minlanadi.