Oʻzbekiston respublikasining soliq kodeksi (Yangi tahriri) Oʻzbekiston Respublikasining

148-modda. Hujjatlar va buyumlarni olib qoʻyish 
(1-q.)
Hujjatlar va buyumlarni olib qoʻyish soliq organining soliq tekshiruvini oʻtkazayotgan 
mansabdor shaxsining asoslantirilgan qarori asosida amalga oshiriladi. 
(2-q.)
Hujjatlar va buyumlarni tungi paytda olib qoʻyishga yoʻl qoʻyilmaydi. 
(3-q.)
Hujjatlar va buyumlarni olib qoʻyish xolislar hamda hujjatlari va buyumlarini olib 
qoʻyish amalga oshirilayotgan shaxslar ishtirokida oʻtkaziladi. Zarur boʻlgan hollarda, olib 
qoʻyishni amalga oshirishda ishtirok etish uchun mutaxassis taklif etiladi. 
(4-q.)
Olib qoʻyish boshlanguniga qadar soliq organining mansabdor shaxsi olib qoʻyishni 
amalga oshirish toʻgʻrisidagi qarorni taqdim etadi hamda hozir boʻlgan shaxslarga ularning huquq 
va majburiyatlarini tushuntiradi. 

---

(5-q.)
Soliq organining mansabdor shaxsi hujjatlar va buyumlarini olib qoʻyish amalga 
oshirilayotgan shaxsga ularni oʻz ixtiyori bilan topshirishni taklif etadi, taklif rad etilgan taqdirda 
esa olib qoʻyishni majburiy tarzda amalga oshiradi. 
(6-q.)
Oʻziga nisbatan olib qoʻyish amalga oshirilayotgan shaxs olib qoʻyilishi lozim boʻlgan 
hujjatlar va buyumlar saqlanishi mumkin boʻlgan binolarni yoki boshqa joylarni ochishdan bosh 
tortganda, soliq organining mansabdor shaxsi tambalarga, eshiklarga va boshqa buyumlarga 
zarurat sababli yuzaga kelmagan shikast yetkazishdan qochib olib qoʻyishni mustaqil tarzda 
bajarishga haqli. 
(7-q.)
Soliq tekshiruvi predmetiga aloqasi boʻlmagan hujjatlar va buyumlar olib 
qoʻyilmaydi. 
(8-q.)
Hujjatlar va buyumlarni olib qoʻyishni amalga oshirish toʻgʻrisida ushbu Kodeksning 
154-moddasida hamda mazkur moddada nazarda tutilgan talablarga rioya etgan holda bayonnoma 
tuziladi. 
(9-q.)
Olib qoʻyilgan hujjatlar va buyumlar olib qoʻyish bayonnomasida yoki unga ilova 
qilinadigan roʻyxatlarda aniq nomi, soni, oʻziga xos xususiyatlari va imkon qadar buyumlarning 
qiymati koʻrsatilgan holda sanab oʻtiladi hamda roʻyxatga olinadi. 
(10-q.)
Agar soliq nazorati tadbirlarini oʻtkazish uchun tekshirilayotgan shaxs hujjatlarining 
koʻchirma nusxalari yetarli boʻlmasa hamda soliq organlarida hujjatlarning asl nusxalari yoʻq 
qilinishi, yashirilishi, oʻzgartirilishi yoki almashtirib qoʻyilishi mumkinligi toʻgʻrisida taxmin 
qilish uchun yetarlicha asoslar mavjud boʻlsa, soliq organining mansabdor shaxsi hujjatlarning 
aslini ushbu moddada nazarda tutilgan tartibda olib qoʻyishga haqli. Bunday hujjatlar olib 
qoʻyilayotganda ulardan soliq organining mansabdor shaxsi tomonidan tasdiqlanadigan koʻchirma 
nusxalar olinadi va hujjatlar olib qoʻyilayotgan shaxsga topshiriladi. 
(11-q.)
Hujjatlarni olib qoʻyish bilan bir vaqtning oʻzida koʻchirma nusxalarni tayyorlash 
yoki topshirish imkoni boʻlmagan taqdirda, soliq organi koʻchirma nusxalarni hujjatlari olib 
qoʻyilgan shaxsga hujjatlar olib qoʻyilganidan keyin besh kun ichida topshiradi. 
(12-q.)
Barcha olib qoʻyiladigan hujjatlar va buyumlar xolislarga hamda olib qoʻyishda 
ishtirok etuvchi boshqa shaxslarga koʻrsatiladi va zarur boʻlgan taqdirda olib qoʻyilgan joyda 
oʻraladi. 
(13-q.)
Olib qoʻyilgan hujjatlar raqamlanishi, tikilishi va olib qoʻyilayotgan shaxsning muhri 
yoki imzosi bilan tasdiqlangan boʻlishi kerak. Ushbu shaxs olib qoʻyilayotgan hujjatlarni muhr 
yoki imzo bilan tasdiqlashdan bosh tortgan taqdirda, olib qoʻyish toʻgʻrisidagi bayonnomaga bu 
haqda maxsus belgi qoʻyiladi. 
(14-q.)
Hujjatlar va buyumlarni olib qoʻyish toʻgʻrisidagi bayonnomaning koʻchirma nusxasi 
ular qaysi shaxsdan olib qoʻyilgan boʻlsa, oʻsha shaxsga imzo qoʻydirib topshiriladi yoki 
yuboriladi.