Педагогик атамалар луғати

Ролли ўйин – таълим соҳасида кенг тарқалган ўқитиш методи.
Ростгўйлик – ҳар қандай шароитда ҳам ҳақиқатни айтиш, чин гапириш, ҳаққоният юзасидан иш тутишдан иборат ижобий характер хислати.
Ротацизм – «Р» товушини талаффуз қила олмасликдан иборат нутқ камчилиги.
Рус тили ва адабиёти хонаси – рус тили ва адабиёти фанини ўқитишда дарс ва дарсдан ташқари машғулотларни самарали ташкил этишга қаратиб махсус жиҳозланган ўқув хонаси.
Рус тили Давлат таълим стандарти – рус тили таълим мазмуни ва ушбу ўқув предмети бўйича ўқувчилар эгаллайдиган билим, кўникма, малакаларга қўйилган талабларни давлат томонидан тасдиқланган эталони, модели.
Рус тили ўқитиш методикаси – 1) рус тили таълими назарияси ҳамда методикаси бўйича талабаларга муайян билим, кўникма, малакалар ҳосил қилишга йўналтирилган ўқув фани; 2) рус тили ўқитиш методикаси хусусий педагогиканинг асосий сохаси.
Рус-тузем мактаблари (рус. туземец - маҳаллий аҳоли) - Туркистонда октябр тўнтаришига қадар маҳаллий аҳоли болалари учун очилган бошланғич рус мактаблари.
Руҳий ривожланиш – инсон ҳаётининг турли босқичларида оддийдан мураккабга, қуйидан юқорига қараб содир бўладиган руҳий ўзгаришлар жараёни.
Руҳият – миянинг объектив оламни алоҳида йўсинда (сезги, идрок, тасаввур, фикр, ҳиссиёт каби шаклларда) акс эттириш қобилияти.


С


Савод – 1) ўқиш-ёзишдан хабардорлик, хат-савод; 2) муайян соҳадаги энг зарурий билим, маълумот.
Саводхонлик – 1) алоҳида маданий савия кўрсаткичларидан бири; 2) инсоннинг адабий тил меъёрларига мувофиқ келадиган оғзаки ва ёзма нутқ малакаларига эгалиги; 3) оддий матнларни ўқиш ва ёза олиш кўникмасига эгалик; 4) муайян соҳа бўйича билимга эгалик.
Саводга ўргатиш мактаби – 20-аср бошларида собиқ шўролар иттифоқи ҳудудида ишчи ва деҳқонларнинг болаларига савод ўргатиш учун ташкил этилган ва ўқитиш аксарият ўқитувчи эмас, саводи чиққан киши томонидан олиб борилган қуйи даражадаги бошланғич мактаб.