Restavratsiyaning adgeziv texnikasi hozirgi vaqtda terapevtik stomatologiyada eng

---

9.3. ADGEZIV TEXNIKA 
Restavratsiyaning adgeziv texnikasi hozirgi vaqtda terapevtik stomatologiyada eng 
keng tarqalgan turidir. U kompozitning emalga va dentinga birikishishini 
ta’minlaydi . 
Kompozitlar bilan plombalashning barcha holatlarida restavratsiyaning adgeziv 
texnikasini qo‘llash maqsadga muvofiqdir, chunki u plombani yaxshi joylashishini, 
dentin yuzasining ishonchli germetizatsiyasini ta’minlaydi, plomba ashyoining 
polimerizatsion bosimning salbiy ta’sirini kamaytiradi, asoratlar xavfini 
kamaytiradi. 
Adgeziv texnikadan foydalanishning sharti – bu samarali dentin adgezivining 
mavjudligi va karies bo‘shlig‘ining mutlaq quruqligiga erishish imkoniyatidir. 
Adgeziv texnika yuza va o‘rta darajadagi karieslarda, tishning estetik 
parametrlarini tiklashda (barcha sinfga mansub karioz bo‘shliqlarni Blek bo‘yicha 
plombalash, adgeziv yuzaqoplamalarni tayyorlaswh, diastemani yopish va 
boshqalar) qo‘llaniladi. Og‘ir darajadagi karieslarda, og‘iz bo‘shlig‘i gigienasi 
qoniqarli bo’lmaganda va "qo‘shimcha" kariesogen omillar mavjudligida adgeziv 
texnikani qo‘llash maqsadga muvofiq bo’lmaydi, chunki bu holatda asoratlar xavfi, 
ayniqsa, karieslar retsidivi yuqori darajada bo‘ladi. 
Adgeziv texnika usuli bo‘yicha kompozit plombalarni qo‘yish bosqichlari. 
1. Tish yuzasini tozalash. Ushbu muolaja har qanday ashyolar bilan plombalashda 
umumiy va majburiy hisoblanadi. Bu bosqichda plombalanadigan tish yuzasi, 
shuningdek, qo‘shni tishlar, ba’zan esa boshqa jag‘dagi tishlar qattiq va yumshoq 
karashlardan, pigmentatsiyadan va h.k. tozalanadi. Tishlar yuzasidagi karashlarni 
olib tashlash uchun qo‘l asboblari – silliqlovchi boshchalar, aylanalar va disklar 
ishlatiladi (ftor saqlamaydigan abraziv pastalar bilan). So‘ngra tishlar yaxshilab 
suv bilan yuviladi. 
Ba’zi hollarda, masalan, milkning kuchli yallig‘lanishi va qon ketishi kuzatilgan 
holatlarda, avval parodontal terapiya o‘tkaziladi, tishlarning estetik restavratsiyasi 
esa marginal parodontda patologik jarayonlar yo‘qolgunga qadar kechiktiriladi. 
Bemorda og‘iz bo‘shlig‘ining sanatsiyasini o‘tkazishdan oldin, tishlarini to‘liq 
professional tozalash maqsadga muvofiq deb o‘ylaymiz. Ushbu muolajani 
terapevt-stomatolog, parodontolog yoki gigienist bajara oladi. 

---

2. Restavratsiyani o‘tkazishni rejalashtirish va plombalovchi ashyoning rangini 
tanlash. Ushbu bosqich juda mas’uliyatli va murakkab bo’lib, yakuniy natija uning 
to‘g‘ri bajarilganiga bog‘liq. 
Ushbu bosqichda restavratsiya uchun umumiy rejalar tuziladi, tish qattiq 
to‘qimasini charxlash, tibbiy, biomexanik va estetik nuqtai nazardan qo‘llanilishi 
asoslangan plomba ashyolarini tanlab olish, parapulpar va kanal ichi shtiftlaridan 
foydalanish zaruriyati aniqlanadi. 
Og‘iz bo‘shlig‘i gigienasining darajasi baholanadi. Yuqorida aytib o‘tilganidek, 
patsient og‘iz bo‘shlig‘i gigienasiga rioya qilmaganda va chekkanda plomba ashyoi 
yuzasining yaltiroqligi tezda yo‘qoladi va marginal pigmentatsiya paydo bo‘lishiga 
olib keladi. Bemor tomonidan muntazam ravishda spirtli ichimliklar iste’mol 
qilinganda ham kompozit restavratsiyaning abraziv emirilishi tezlashadi, 
ashyoning rang turg‘unligi yomonlashadi.