Soraw hám tapsırmalar

Dene tárbiya hám sporttı qollap-quwatlawshı sistemasınıń jaratılıwı. Ózbekstanda mámleket ǵárezsizligi qolǵa kirgizilgennen keyin mádeniyat, bilimlendiriw, ilim-pán menen bir qatarda dene tárbiyası hám sport islerine úlken itibar qaratıldı. Mámleket byudjetinen ajıratılıp atırǵan qarjınıń úzliksiz artıp barıwı da elde dene tárbiyası hám sport tarawı mámleketlik siyasatınıń áhmiyetli baǵdarlarınan biri sıpatında qaralıp, tarawǵa bolǵan úlken itibardıń kórinisi. Haqıyqatında, belgili xalıqaralıq jarıslarda elimiz sportshılarınıń tabıslı qatnasıwlarınıń eń tiykarǵı sebeplerinen biri de usı tarawdıń mámleket tárepinen turaqlı qollap-quwatlanıwınan bolıp esaplanadı. 1992-jılı Ózbekstan Respublikası Oliy Majlisiniń IX sessiyasında «Dene tárbiyası hám sport haqqında» nızam qabıllanıwı hám oǵan ózgeris hám qosımshalar kirgizilip, 2015-jılı jańa redakciyası tastıyıqlanıwı sport tarawınıń jáne de rawajlanıwına xızmet etti. Respublikada joqarı tájiriybeli sportshılardı tayarlawǵa qánigelestirilgen 536 balalar-óspirimler sport mektepleri, 5 olimpiya rezervleri kolledjleri, 8 respublika joqarı sport sheberi mektepleri xızmet kórsetpekte. Ózbekstan Respublikası Prezidenti Shavkat Mirziyoev 2017-jılı 10-avgustta «Ózbekstan mámleketlik dene tárbiya insitutı xızmetin jáne de jetilistiriw ilajları haqqında»ǵı qarardı tastıyıqladı. Oǵan muwapıq, Ózbekstan mámleketlik dene tárbiya institutı Tashkent wálayatı Chirchiq qalasına kóshirildi. Ózbekstan mámleketlik dene tárbiya institutında 2017—2018-oqıw jılınan baslap bilimlendiriwdiń sırtqı bólimi ashıldı. Elimizde dene tárbiya hám sporttıń materiallıq-texnikalıq bazasın rawajlandırıw boyınsha bir qatar jumıslar ámelge asırıldı. Atap aytqanda, Tashkent, Namangan, Jizzax, Ferǵana, Buxara, Xorezm, Andijan, Samarqand, Gúlistan hám basqa qalalarda xalıqaralıq standartlarǵa juwap beretuǵın bir qatar sport kompleksleri qurıldı. Tashkent qalasındaǵı «Yunusabad», «Jar», «Bunyodkor», Namangan qalasında «Pahlavon», Jizzax qalasındaǵı Olimpiya rezervleri kolledji sport kompleksleri hám basqalar usılar qatarınan bolıp esaplanadı. Ózbekstan Respublikası Prezidentiniń 2018-jılı marttaǵı pármanına muwapıq, Ózbekstan Respublikası Dene tárbiya hám sport mámleketlik komiteti shólkemlestirildi.