Stroma-tamırlı beloklı distrofiyalar. Amiloidoz

Stroma-tamırlı beloklı distrofiyalar. Amiloidoz
Stroma-tamır distrofiyası (mezenximal distrofiya) ushın biriktiriwshi toqımadaģı zatlar almasınıwınıń buzılģanın kórsetiwshi quramalı patologiyalıq process bolıp, organlar stroması hám tamırlar diywalında alteraciya baslanıwı menen birge dawam etip baradı. Almasınıwdıń qaysı túri buzılģanına qarap mezenximal distrofiyalar: 1) belok distrofiyaları, 2) may distrofiyaları, 3) uglevod distrofiyalarģa bólinedi.
Belok distrofiyaları
Stroma-tamır belokları distrofiyalarına tómendegiler kiredi: 1) mukoid jibiw, 2) fibrinoid jibiw, 3) gialinoz, 4) amiloidoz. Házir aytıp ótilgen distrofiyalar biriktiriwshi toqıma dúzilisiniń buzılıwı bolıp, belok tábiyatlı zatlar toplanıp barıwı menen birge dawam etedi.
Etiologiyasi. Sistemalarģa baylanıslı mukoid, fibrinoid, jibiw hám gialinozdıń tiykarģı sebepleri infekcion allergiyalıq kesellikler, gipoksiya, immunopatologiyalıq hám angionevrotik reakciyalar, endokrinopatiyalar, azıqlanıwdıń buzılıwı, násillik faktorlar bolıp esaplanadı. Biriktiriwshi toqımanıń mukoid hám fibrinoid jibiwi tábiyatına kóre autoimmun bolģan bir qansha keselliklerdiń tiykarında jatadı. Revmatizm, túyinsheli periaterit, sklerodermiya usınday kesellikler bolıp esaplanadı.
Belok almasınıw ónimleriniń toplanıp qalıwına alıp baratuģın faktorlar tómendegiler:

1. 
   Toqıma-tamırlar ótkiziwsheńliginiń ózgeriwi (plazmorragiya);
   
2. 
   Biriktiriwshi toqıma struktura elementleriniń (kollagen, retikulyar, elastik talshıqlarınıń) buzılıp, fizikalıq hám ximiyalıq qásiyetleriniń ózgerip ketiwi;
   
3. 
   Belok polisaxarid kompleksleri payda bolıp, olardıń tamırlar diywalı hám stroma tiykarģı zatında toplanıp barıwı.
   

Amiloidozda payda bolatuģın belok polisaxarid kompleksleri quramına normada ushıramaytuģın anomal fibrilliar belok kiredi.
Mukoid jibiw
Mukoid jibiw biriktiriwshi toqıma dúzilisiniń júzeki buzılıwı, mezenximal disproteinozdıń baslanģısh hám qaytarılıw basqıshı bolıp esaplanadı.
Mukoid jibiw tiykarında “prokollagen – kollastromin” kompleksiniń jeńil dárejede ózgerip, toluidin kógi menen ózine tán reakciyalardı beretuģın xondriotinsulfat hám gilauronat kislotaları (glikozaminglikanlar) ajıralıp shıģıwınan ibarat. Sezilerli dárejede gidrofil qásiyetlerge iye bolģan usınday glikozaminglikanlar toqıma hám tamırlar ótkiziwsheńliginiń kúsheyip ketiwine sebep boladı.