Тошкент вилояти чирчиқ давлат педагогика институти ҳузуридаги илмий даражалар берувчи dsc

“Тажриба-синов ишларининг мазмуни ва натижалари 
таҳлили” деб номланган учинчи бўлимида тадқиқотнинг педагогик тажриба-
синов ишлари мазмуни ва математик-статистик таҳлили берилган. 
Тадқиқотнинг тажриба-синов ишлари уч босқичда амалга оширилди: 1. 
Асословчи босқич: 2019 йил. 2. Шакллантирувчи босқич: 2020 йил. 3. 
Умумлаштирувчи босқич: 2021 йил.
 
Асословчи босқичда умумий ўрта таълим мактабларидаги она тили ва 
адабиёт фанини ўқитишнинг илмий-педагогик асослари ва унга тегишли 
ўқув-услубий, илмий адабиётларни ўрганиш, тажриба-синов ишлари олиб 
бориладиган объектларни белгилаш, жараён режаси, анкета саволлари ва тест 
топшириқлари ишлаб чиқиш, мактаб ўқитувчиларига замонавий педагогик 
ёндашувлар, уларнинг мазмун-моҳияти, PISA тадқиқотларида ўқиш 
саводхонлиги тушунчаси бўйича тушунтириш ишлари, семинарлар, мастер-
класслар ташкил қилинди, тажриба ва назорат гуруҳларида ўқувчиларнинг 
тажриба-синовдан олдинги ўзлаштириш кўрсаткичлари аниқланди, тадқиқот 
тақозосига кўра сўровномалар ўтказилди ва педагогик тажриба-синов 
ишлари йўлга қўйилди.
Шакллантирувчи босқичда эса педагогик тажриба-синов ишларида 
кўзда тутилган асосий чора-тадбирлар мажмуи: тажриба гуруҳларида 
замонавий педагогик ёндашувлар асосида дарс машғулотларини ташкил 
қилиш, дарс машғулотларини кузатиш ва мониторингини юритиш, 
ўқитувчиларга қўшимча маълумотлар бериб бориш, тажриба-синов ишлари 
давомида кузатилган айрим камчиликларни бартараф қилиш, дастур ва 
режага тегишли тузатиш ҳамда ўзгартиришлар киритиш, сўровномалар 
ўтказиш каби ишлар амалга оширилди. Инноватор ўқитувчига қўйиладиган 
талаблар, унинг дарс машғулоти ҳамда ёшларни ностандарт фикрлашга 
ўргатишнинг мезонлари, шакллари аниқланди ва улардан умумтаълим 
мактаб ўқитувчиларининг фойдаланиши бўйича таклиф, тавсия ва 
кўрсатмалар ишлаб чиқилди ва тажриба-синов жараёнига жорий этилди.