U. ǴAfurov, Q. Sharipov

BILIMIŃIZDI SÍNAP KÓRIŃ!
1. Isbilermenlik qanday túrlerge bólinedi?
2. Belgili bir isbilermenlik túrin tańlawda neler esapqa alınadı?
3. Óndiris isbilermenliginiń ózine tán belgileri qanday?
4. Qanday jaǵdayda óndiris isbilermenligin tańlaw múmkin?
5. Kommerciyalıq isbilermenliktiń tiykarǵı táreplerin túsindirip beriń.

---

14
JEKE TÁRTIPTEGI ISBILERMENLIK
3-TEMA
JEDELLESTIRIWSHI SORAW HÁM TAPSÍRMALAR
1. Joqarıdaǵı súwretlerde kórsetilgen qaysı xızmet túrlerin jeke tártiptegi 
isbilermenlik formasında shólkemlestiriwge boladı?
2. Usı xızmet túrlerin jeke tártiptegi isbilermenlik tiykarında alıp barıw 
múmkinligi ne menen túsindiriledi?
3. Kimler jeke tártiptegi isbilermenler bola aladı dep oylaysız?
JEKE TÁRTIPTEGI ISBILERMENLIKTIŃ MAZMUNÍ
Siz isbilermenlikti baslamastan aldın onı qanday formada ámelge 
asıratuǵınıńızdı anıqlap alıwıńız kerek. Bunıń ushın dáslep eń 
ápiwayı formanı tańlaw maqsetke muwapıq boladı. Bul bolsa jeke 
tártiptegi isbilermenlik bolıp tabıladı.
Jeke tártiptegi isbilermenlik — yuridikalıq shaxs shólkemlestirmesten 
jeke isbilermenlik xızmetin ámelge asırıw forması bolıp esaplanadı. 
Bunday xızmetti ámelge asırıw ushın «jeke tártiptegi isbilermen» 
sıpatında mámleketlik dizimnen ótiwdiń ózi jetkilikli.
Jeke tártiptegi isbilermenlik fizikalıq shaxs (jeke tártiptegi 
isbilermen) tárepinen isbilermenlik xızmetin yuridikalıq shaxs 
shólkemlestirmegen halda ámelge asırıw bolıp tabıladı.
Ózbekstan Respublikasınıń 2012-jıl 2-maydaǵı ÓRQ-328-sanlı 
jańa redakciyadaǵı «Isbilermenlik xızmeti erkinliginiń kepillikleri 
haqqında»ǵı nızamı, 6-statya.

---

15
FIZIKALÍQ YAMASA YURIDIKALÍQ SHAXS
Jeke tártiptegi isbilermenlerge berilgen sıpatlamada fizikalıq hám 
yuridikalıq shaxs túsinikleri ushıraydı. Solay eken, bul túsiniklerdiń 
mánisin bilip alıw isbilermenlik formaları haqqında keńirek 
maǵlıwmatqa iye bolıw múmkinshiligin beredi.