U. ǴAfurov, Q. Sharipov

JEDELLESTIRIWSHI SORAW HÁM TAPSÍRMALAR
1. Joqarıdaǵı infografikada keltirilgen jeke kárxananıń qaysı belgisin 
eń áhmiyetli dep esaplaysız?
2. Eger siz ózińizdiń isbilermenlik xızmetińizdi shólkemlestirmekshi 
bolsańız jeke kárxananıń qaysı tárepleri sizge maqul keledi?
3. Sizler ózińiz bilgen jeke kárxanalar haqqında mısallar keltiriń.
JEKE KÁRXANA TÚSINIGI
Ayırım isbilermenler óziniń xızmetiniń kólemine emes, al 
onıń ǵárezsiz ekenligine úlken itibar qaratadı. Sebebi, basqarıw, 
xojalıq qararların shıǵarıw hám dáramatın bólistiriwdegi ǵárezsizlik 
isbilermenniń máplerine tolıq say keliwi múmkin. Bul jaǵdayda 
isbilermenliktiń jeke kárxana forması hár tárepleme muwapıq boladı.
Múlk iyesi birden-bir fizikalıq shaxs tárepinen dúzilgen hám 
basqarılatuǵın kommercant shólkemi jeke kárxana dep kórsetiledi. 
Jeke kárxana isbilermenlik subyektleriniń shólkemlestiriwshilik-
huqıqıy forması bolıp tabıladı.
Ózbekstan Respublikasınıń 2003-jıl 11-dekabrdegi 558-II-sanlı 
«Jeke kárxana haqqında»ǵı nızamı, 3-statya.

---

31
Jeke kárxana birden-bir múlk iyesi tárepinen dúziledi. Múlk 
iyesi jeke kárxanaǵa tiyisli mal-múlk beredi hám onıń ustavın 
tastıyıqlaydı. Jeke kárxana shólkemlestiriwshisi tek fizikalıq shaxs 
boladı. Bul bir shaxs tárepinen jaratılǵan mákeme bolıp, biznes 
xızmeti shólkemlestiriwshiniń óziniń múlkleri tiykarında ámelge 
asırıladı. Sizler elimizdegi jeke kárxanalar tárepinen islep shıǵarılǵan 
ónimlerdi ańsat ajıratıp alıwıńız múmkin. Sebebi, bul ónimlerdiń 
islep shıǵarıwshısı haqqındaǵı maǵlıwmatta firma atınan keyin «jeke 
kárxana» degen sóz yamasa «JK» abbreviaturası jazılǵan boladı.
JEKE KÁRXANANÍŃ ÓZGESHELIK TÁREPLERI
Jeke kárxana xızmetiniń ózine tán tárepi sol, ol basqa 
shólkemlestiriwshilerdiń aralasıwısız, bir adamnıń jeke basshılıǵı 
astında ámelge asırıladı. Jeke kárxananıń múlk iyesi kárxananı basshı 
sıpatında jeke basqaradı. 
Itibarlı tárepi, jeke kárxana xızmetine basqa shólkemlestiriwshilerdiń 
aralasıwı biykar etilse de, bul jeke kárxananıń basqa kárxanalar 
xızmetinde qatnasıwı ruqsat etilgen.
Jeke kárxana nızam hújjetlerinde belgilengen tártipte basqa 
yuridikalıq shaxslardıń shólkemlestiriwshisi bolıwǵa yamasa olardıń 
ustav fondında ózgeshe tárizde qatnasıwǵa, wákillikke iye orınlar 
ashıwǵa hám filiallar dúziwge haqılı.