Yetim bolalar va ota-onasining yoki boshqa qonuniy vakillarining qaramog‘idan mahrum bo‘lgan bolalarning ijtimoiy himoyasini yanada kuchaytirish chora-tadbirlari to‘g‘risida

3-bob. O‘quvchi (talaba)ga ijtimoiy ta’minot yordamini berishni rasmiylashtirish tartibi
18. O‘quvchi (talaba)ga ijtimoiy ta’minot yordami ishchi guruhning qaroriga muvofiq qabul qilingan ta’lim muassasasi rahbarining buyrug‘iga asosan beriladi.
19. Muassasa buxgalteri tomonidan ijtimoiy ta’minot yordami, transportda yurish kartochkalari hamda bitiruv nafaqasini berish bo‘yicha ushbu Nizomga 4-ilovaga muvofiq shaklda ikki nusxada so‘rovnoma tuziladi.
20. So‘rovnomaning bir nusxasi uch ish kunida tegishliligi bo‘yicha budjet mablag‘larini taqsimlovchilarning moliya-iqtisod bo‘linmalariga (keyingi o‘rinlarda — moliya organlari) taqdim etiladi.
21. So‘rovnoma muassasaning birinchi bosqichiga qabul qilingan o‘quvchi (talaba)lar uchun har yili 15-sentabrgacha, boshqa o‘quvchi (talaba)larga esa kelgusi yil uchun joriy yilning 15-dekabriga qadar shakllantiriladi.
Muassasada ta’lim olayotgan davrida to‘liq davlat ta’minotiga olingan o‘quvchi (talaba)lar uchun so‘rovnoma u to‘liq davlat ta’minotiga olingandan so‘ng 15 kun ichida shakllantiriladi.
Oldingi tahrirga qarang.
22. Moliya organlari tomonidan so‘rovnomaga binoan qonunchilik hujjatlarida belgilangan tartibda muassasaning xarajatlar smetasiga tegishli o‘zgartirishlar kiritish orqali mablag‘ ajratiladi.
(22-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
4-bob. O‘quvchi (talaba)larga ijtimoiy ta’minot yordamini berish tartibi
23. O‘quvchi (talaba)ga ijtimoiy ta’minot yordamini berish naqd pul shaklida yoki ularning bank plastik kartasiga pul o‘tkazish orqali amalga oshiriladi.
24. O‘quvchi (talaba)larning xohishiga ko‘ra ijtimoiy ta’minot yordamini olish uchun to‘lanadigan pul mablag‘larining o‘rniga unga teng miqdorda kiyim-bosh, poyabzal va boshqa ashyoviy ta’minot buyumlari berilishi mumkin.
Kiyim-bosh, poyabzal va boshqa ashyoviy ta’minot buyumlari ushbu Nizomga 2-ilovaga muvofiq ro‘yxatda belgilangan ashyoviy ta’minot buyumlari orasidan o‘zi istagan buyumlarni ko‘rsatgan holda o‘quvchi (talaba)ning muassasa rahbari nomiga yozgan arizasiga binoan beriladi.
25. O‘quvchi (talaba)ga ijtimoiy ta’minot yordami shaxsiy imzosi qo‘yilgan tarqatish qaydnomasi asosida beriladi.
26. Ayrim sabablarga ko‘ra o‘tgan davr uchun to‘lanmay qolgan ijtimoiy ta’minot yordami keyingi to‘lovlarga qo‘shib to‘lanadi.