Ўзбекистон республикаси адлия вазирлиги тошкент давлат юридик институти
Қонунда ҳар хил жазо турлари назарда тутилган жиноятлар
Download 1.89 Mb. Pdf ko'rish
|
ҲОЗИРГИ ЗАМОН жиноят ҳуқуқи муамолари
|
Қонунда ҳар хил жазо турлари назарда тутилган жиноятлар учун жазо тайинлаш. Ўзбекистон Республикаси Жиноят кодексининг 15-моддасида жиноятларнинг ижтимоий хавфлилик даражасига қараб таснифлаш назарда тутилган бўлиб, барча жиноятлар ижтимоий хавфи катта бўлмаган, унча оғир бўлмаган, оғир ва ўта оғир жиноятларга бўлинган. Айбдор томонидан содир этилган жиноятларнинг барчаси фақат ижтимоий хавфи катта бўлмаган ёки фақат унча оғир ёхуд ўта оғир бўлмаслиги мумкин. Айбдор томонидан содир этилган жиноятларнинг бири ижтимоий хавфи катта бўлмаган, иккинчиси оғир ёки ўта оғир бўлиши мумкин. Жиноят кодекси Махсус қисмининг моддалари санкциясидаги жазо тури ва муддати жиноятнинг ижтимоий хавфлилик даражасига қараб белгиланган. Айбдорнинг қилмиши квалификация қилинган жиноят-ларнинг ижтимоий хавфлилиги ҳар хил бўлиши ва шунга муво-фиқ равишда жазолар ҳам ҳар хил белгиланган. Масалан, агарда айбдорнинг қилмишлари ЖКнинг 109-моддаси 2-қисми ва 105-моддаси билан квалификация қилинган бўлса, 109-модданинг 2-қисми санкциясида жарима, ахлоқ тузатиш ишлари ва энг оғир жазо сифатида қамоқ жазолари, 105-модданинг 2-қисмида эса фақат озодликдан маҳрум қилиш жазоси назарда тутилган. Бундан ташқари, Ўзбекистон Республикасининг 1999 йил 20 августдаги Жиноят кодексига айрим қўшимча ва ўзгарти-ришлар киритиш тўғрисидагиҚонуни билан ЖКнинг бир қатор моддаларига (масалан, 180, 181, 184, 185 ва ҳоказо моддалар) “Етказилган моддий зарар уч карра миқдорда қопланган тақдирда, озодликдан маҳрум қилиш тариқасидаги жазо қўлланилмайди”, деган қисм билан тўлдирилди. 1 Шунингдек, “Жиноий жазоларнинг либераллаштирилиши муносабати билан Ўзбекистон Республикасининг Жиноят, Жиноят - процессуал кодекслари ҳамда Маъмурий жавобгарлик тўғрисидаги кодексга ўзгартишлар ва қўшимчалар киритиш ҳақида”ги Ўзбекистон Республикасининг 2001 йил 29 августдагиҚонуни билан Жиноят кодексининг анчагина моддаларига (масалан, 167, 168, 170 ва ҳоказо моддалар) етказилган моддий зарарнинг ўрни қопланган тақдирда озодликдан маҳрум қилиш ва қамоқ жазосининг қўлланилмаслиги тўғрисидаги қисм билан тўлдирилди. 2 Шу муносабат билан айбдорнинг бир неча жиноятлари учун жазо тайинлашда айрим муаммолар пайдо бўлди.Қуйида ушбу масалаларга қисқача тўхталиб ўтамиз. Жиноят содир этишда айбланаётган шахснинг қилмишлари ЖК Махсус қисмининг турли моддалари ёки битта моддасининг турли қисмлари билан жиноятлар жами тариқасида квалификация қилинган ва жиноятлар учун ҳар хил турдаги асосий жазолар назарда тутилган бўлса, бундай жиноятлар учун жазоларни қўшишнинг қоидалари Ўзбекистон Республикаси ЖКнинг 61-моддасида белгиланган. Ўзбекистон Республикаси ЖКнинг 43-моддасида назарда тутилган жазо тизимидаги жазоларни бир неча жиноятлар учун тайинлаш усулига қараб икки гуруҳга бўлиш мумкин, булар: 1) бир-бири билан қўшиш мумкин бўлган жазолар; 2) қўшиш мумкин бўлмаган ва алоҳида ижро этиладиган жазолар. Қўшиш мумкин бўлган жазоларга ахлоқ тузатиш ишлари, хизмат бўйича чеклаш, қамоқ, интизомий қисмга жўнатиш киради. Шуни алоҳида таъкидлаш керакки, бу жазолар бир-бири билан қўшилмай, ЖКнинг 61-моддасида белгиланган қоидаларга кўра фақат озодликдан маҳрум қилиш жазосига қўшилади. Агар тайинланган жазолар бир хил бўлса, олдинги параграфда айтганимиздек, қоплаш, қисман ёки тўла қўшиш орқали ягона жазо тайинланаверади. Бу ерда гап фақат тайинланган жазолар ҳар хил бўлса, ягона жазо тайинлаш устида кетмоқда. Озодликдан маҳрум қилишга қўшилмай алоҳида ижро этиладиган асосий жазоларга жарима ва муайян ҳуқуқдан маҳрум 1 Ўзбекистон Республикаси Олий Мажлисининг Ахборотномаси, 1999 йил, 9-сон, 229-модда. 2 Халқ сўзи. 2001 йил 18 октябрь. қилиш тариқасидаги жазолар киради ва улар бошқа турдаги жазоларга қўшилмай, алоҳида-алоҳида тайинланади. Масалан, жиноятлар жами тариқасида квалификация қилинган жиноятларнинг бири учун ахлоқ тузатиш ишлари, иккинчиси учун жарима тайинланган бўлса, уларнинг ҳар иккаласи асосий жазо сифатида алоҳида-алоҳида тайинланади. Ўзбекистон Республикаси ЖКнинг 61-моддаси мазмунига кўра, ҳар хил турдаги жазолар қўшилганда, фақат озодликдан маҳрум қилишга, қамоқ, интизомий қисмга жўнатиш, ахлоқ тузатиш ишлари ёки хизмат бўйича чеклаш жазосини қўшиш мумкин.Қамоқ ва интизомий қисмга жўнатиш ёки қамоқни ахлоқ тузатиш ишлари билан қўшиш мумкинми? ЖКнинг 61-моддаси мазмунига кўра мумкин эмас, улар фақат озодликдан маҳрум қилиш жазосига қўшилади.Қонунда озодликдан маҳрум қилишдан бошқа турдаги жазоларнинг бир-бири билан қўшиб ягона жазо тайинлаш тартиби назарда тутилмаган. ЖКнинг Махсус қисми бир қанча моддаларида етказилган моддий зарар уч карра миқдорда қопланган тақдирда озодликдан маҳрум қилиш тариқасидаги жазо қўлланилмайди деган ҳамда моддий зарарнинг ўрни қопланган тақдирда озодликдан маҳрум қилиш тариқасидаги жазо қўлланилмайди, деган қисм билан тўлдирилганлиги муносабати билан озодликдан маҳрум қилишни тайинлашнинг қонунда чекланганлиги бир қатор муаммоларни келтириб чиқаради. Масалан, айтайлик, қилмиши 167-модданинг 2- қисми (ўзлаштириш ва растрата қилиш) ва 228-модда (ҳужжатларни қалбакилаштириш)нинг 1-қисми билан жиноятлар жами тариқасида квалификация қилинган бўлиб, жиноятларнинг бири учун озодликдан маҳрум қилишдан бошқа, яъни ахлоқ тузатиш ишлари, иккинчиси учун қамоқ ёки бошқа бир жазо тури тайинланган бўлса, ягона жазо тайинлаш тартиби қандай бўлади? Бизнингча, ЖК Махсус қисми моддалари санкциясида назарда тутилган алоҳида ижро этиш мумкин бўлган жазо турларини назарда тутувчи санкцияларни янада кенгайтириш керак. Ўзбекистон Республикаси ЖКнинг 61-моддасида жазоларни қўшишнинг қуйидаги тартиби белгиланган. Ҳар хил турдаги асосий жазоларни қўшганда озодликдан маҳрум қилишнинг бир куни: а) қамоқ ёки интизомий қисмга жўнатишнинг бир кунига; б) ахлоқ тузатиш ишлари ёки хизмат бўйича чеклашнинг уч кунига ҳисоблаб бу жазолар озодликдан маҳрум қилиш туридаги қатъий жазо тайинланади. Агар айбдорнинг қилмишлари жиноятлар жами тариқасида квалификация қилинган бўлиб, жиноятлардан бири учун етказилган моддий зарарни қоплаганлиги учун озодликдан маҳрум қилиш қўлланмай, жарима ёки ахлоқ тузатиш ишлари ёхуд бошқа бир жазо тайинланган бўлса, жавобгарликка тортилаётган модданинг бошқасида бундай қоидани қўллаш мумкин бўлмай озодликдан маҳрум қилиш назарда тутилган бўлса, қатъий жазо тайинлаш масаласи қандай ҳал қилинади деган савол туғилади. Бундай ҳолда ҳам ЖКнинг 59 ва 61- моддаларида назарда тутилган қоидалар асосида жазо тайинланади. Яъни қўшиш мумкин бўлган жазоларни аввал 61-моддаси тартибида озодликдан маҳрум қилишга айлантирилади, сўнгра тўла ёки қисман қўшиш орқали озодликдан маҳрум қилишни тайинлайди.Қўшиш мумкин бўлмаган жазолар эса алоҳида-алоҳида тайинланади. Иш бўйича ҳукм чиқарилганидан кейин маҳкумнинг биринчи иш бўйича чиқарилган ҳукмгача яна бошқа жиноятда айбли эканлиги аниқланган тақдирда жазо тайинлашда ҳам айрим муаммолар мавжуд. Суд амалиётида шундай ҳодисалар бўладики, шахс бир неча жиноятларни содир қилади, дастлабки тергов органларига, шу жумладан судга содир этилган жиноятларнинг фақат биттаси ёки иккитаси маълум бўлиб, бошқалари маълум бўлмайди. Суд эса маълум бўлган ва тўла исботланган жиноят учун ҳукм чиқаради, маълум бўлмаган жиноят латент жиноят сифатида қолади. Айбдор содир қилган жиноятларнинг бир қисми учун ҳукм чиққанидан кейин шу ҳукмгача яна бошқа жиноятлар содир этганлиги аниқланса, жазо бир неча жиноятлар юзасидан тайинланадими ёки бир неча ҳукмлар юзасидан тайинланадими, деган савол туғилади. Ушбу масала қонунда аниқ белгилаб қўйилиб, уни ҳар хил талқин қилинишига чек қўйилди. Ўзбекистон Республикаси ЖКнинг 59-моддаси 3-қисмида бу қуйидагича ифодаланган: “Агар иш бўйича ҳукм чиқарилганидан кейин маҳкумнинг биринчи иш бўйича чиқарилган ҳукмгача яна бошқа жиноятда айбли эканлиги аниқланса ҳам жазо ўша тартибда (ЖКнинг 59-моддаси 1-қисми тартибида) тайинланади”, дейилади. Демак, бу ерда шахс бир неча жиноятларни содир қилган бўлиб, улардан фақат судга маълум бўлган ва тўла исботланган жиноят учун ҳукм эълон қилинган вақтгача содир қилган жиноятлари назарда тутилмоқда. Бунда биринчи ҳукм бўйича тайинланган жазо (асосий ва қўшимча)ни ўтаб бўлгунча шу ҳукмгача содир этилиб, лекин ҳукмдан кейин аниқланган жиноятлар тўғрисида айтилмоқда. Қўқон шаҳар судида кўрилган А.нинг жиноят ишини мисол тариқасида келтириш мумкин. А. Ўзбекистон Республикаси ЖКнинг 168-моддасининг 2-қисми “а” бандида назарда тутилган (анча миқдордаги мулкни фирибгарлик йўли билан талон-торож қилиш) жиноятни содир қилганликда айбланиб уч йил муддатга ахлоқ тузатиш ишига ҳукм қилинади. Жазонинг бир йил у икки ойини ўтаб бўлганидан кейин шу ҳукмгача яна ЖКнинг 169-моддасининг 3- қисми “б” бандида назарда тутилган жиноятни содир қилганлиги аниқланади. Суд А.нинг содир қилган жиноятини 169-модданинг 2-қисми “б” банди билан тўрт йил озодликдан маҳрум қилиш жазосини тайинлаб, олдинги ҳукм бўйича тайинланган ахлоқ тузатиш ишини 61-модданинг қоидаларига асосланиб ҳар уч кунини озодликдан маҳрум қилишнинг бир кунига ҳисоблаб бир йил озодликдан маҳрум қилиш билан алмаштиради ва 59-модданинг қоидаларини қўллаган ҳолда тўла қўшиш орқали беш йил муддатга озодликдан маҳрум қилишни тайинлайди. А.нинг бир йил-у икки ой ахлоқ тузатиш ишини ўталган қисмини тўрт ой олти кун ҳисоблаб озодликдан маҳрум қилишнинг тўрт ой олти кун қисмини ўтаган ҳисоблансин, деб ҳукмда кўрсатилган. Бизнинг фикримизча, суд А.га нисбатан жазо тайинлашнинг 59 ва 61-моддаларида белгиланган барча қоидаларига риоя қилган. Лекин суд ушбу масалани амалда тўғри ҳал қилган бўлсада, қонунда ноаниқлик мавжуд. Бу камчилик қуйидагилардир: Ўзбекистон Республикаси ЖКнинг 59-моддаси 3-қисмининг охирги жумласида “Бундай ҳолда жиноятлар мажмуи тариқасида суд томонидан тайинланган жазо муддатига биринчи ҳукм юзасидан жазонинг ўталган қисми қўшилади”, дейилади. Албатта ҳам назарий, ҳам амалий жиҳатдан, ҳам жазонинг ўталган қисмининг ўзини янги ҳукм бўйича тайинлашда жазога қўшиш ҳеч қандай мантиққа тўғри келмайди. Бу ерда ушбу модданинг таҳририни ишлаб чиқишда ёки нашр қилишда йўл кўйилган хато бўлиши мумкин. Бизнинг фикримизча, “жазо муддатига биринчи ҳукм юзасидан жазонинг ўталган қисми ҳам қўшилади”, деган мазмунда берилиши керак. Таҳлил этилаётган қоида бўйича жазо тайинлаш биринчи ҳукм юзасидан тайинланган асосий ва қўшимча жазоларни ўтаб бўлгунча қўлланилади. Агарда шахс биринчи ҳукм бўйича тайинланган асосий жазони ўтаб бўлса ва фақат қўшимча жазоси ўталмай қолган бўлса, бундай ҳолда ҳам 59-модданинг 3-қисми қоидалари асосида жазо тайинланади ва кейинги ҳукм бўйича тайинланган жазога биринчи ҳукм юзасидан тайинланган жазонинг қолган қўшимча жазо қисмини қўшиб тайинлайди. Агар биринчи ҳукм юзасидан тайинланган жазо тўла ўтаб бўлинганидан кейин жиноят аниқланган бўлса, ундай ҳолда 59- модданинг учинчи қисми тартибида жазо тайинлашга ҳожат қолмайди. Бунда агар ЖКнинг 64-моддасида назарда тутилган муддатлар ўтмасдан аниқланган бўлса, ўша жиноятнинг ўзи учун жавобгар қилинади. Агар бу жиноят биринчи ҳукмдан олдин содир этилган бўлса, умумий асосларда жазо тайинланаверади. Агарда биринчи ҳукм бўйича содир этилган жиноятдан кейин содир этилган бўлса, суд 56-модданинг 1-қисми “н” бандига асосан оғирлаштирувчи ҳолат деб жазо тайинлаши мумкин. Download 1.89 Mb. Do'stlaringiz bilan baham: 
|