Ózbekstan respublikasí joqarí HÁm orta arnawlí bilimlendiriw ministrligi berdaq atíndaǵÍ qaraqalpaq mámleketlik universiteti qol jazba huqıqında udk : 94. Orazímbetova roza murzambetovna sh. SeyitovtíŃ «xalqabad»

Izertlewde qollanılǵan usıllardıń qısqasha sıpatlaması. Dissertaciyalıq jumısta izertlenip atırǵan materiallardıń baǵdarına hám aldına qoyǵan maqsetine baylanıslı salıstırıw hám bayanlaw metodları qollanıldı. Sh.Seyitovtıń «Xalqabad» romanınıń leksikasınıń semantikalıq hám stillik ózgesheliklerin anıqlawda struktural-semantikalıq usıl qollanıldı.
Temanı izertlew barısında Ózbekstan Respublikası Prezidenti Sh.M.Mirziyoyev «Xalqımızdıń tınısh turmısın támiyinlew, birinshi náwbette, jaslardıń tálim-tárbiyasına, dúnya-qarasına hám ázeliy úrp-ádetlerdi asırap abaylawǵa baylanıslı»¹, - dep kórsetedi. Sonday-aq, Prezidentimizdiń bayanatları hám shıǵıp sóylegen sózlerinde, húkimet qararlarındaǵı milliy qadiriyatlarımızdı, mádeniy miyraslarımızdı qayta tiklew, ana tilimizdi tereń úyreniw hám mámleketimiz ǵárezsizligin bekkemlew jolında olardan ónimli paydalanıp, milliy ideologiyanı rawajlandırıw boyınsha pikirlerin basshılıqqa aldıq. Sonday-aq, til, tariyx, ruwxıylıq haqqındaǵı pikirleri metodikalıq tiykar wazıypasın ótedi. Sh.Seyitovtıń «Xalqabad» romanınıń leksikasınıń semantikalıq hám stillik ózgesheliklerin anıqlawda 1978-1990-jıllar aralıǵında járiyalanǵan Sh.Seyitovtıń IV tomlıq «Xalqabad» romanı izertlew jumısına derek sıpatında xızmet etti.
Izertlew nátiyjeleriniń teoriyalıq hám ámeliy áhmiyeti. Izertlew jumısınıń nátiyjeleri qaraqalpaq ádebiy tilin úyreniwge qosılǵan úles bolıp, keleshekte usı baǵdarda izertlew jumısların dawam ettiriw ushın isenimli tiykar bolıp xızmet etedi. Bul jumıstıń materialların joqarı oqıw orınlarında «Qaraqalpaq tiliniń leksikologiyası», «Qaraqalpaq tiliniń frazeologiyası», «Qaraqalpaq tiliniń stilistikası» hám t.b. teoriyalıq kurslardı oqıtıw barısında qollanba qural sıpatında oqıtıwshılar hám filolog studentler paydalanıwı ushın xızmet etedi.
Izertlewdiń nátiyjesinde alınǵan juwmaqlar qaraqalpaq tiliniń leksikologiyasın, frazeologiyasın úyreniwge qosılǵan úles bolıp, keleshekte usı baǵdarda izertlew jumısların dawam ettiriw ushın tiykar bolıp xızmet etedi. Bul tema boyınsha qollanbalar jazıwda, Sh.Seyitovtıń «Xalqabad» romanınıń leksikasınıń semantikası hám stillik ózgesheliklerin úyreniwde júzege kelgen pikirler qaraqalpaq til biliminiń ayırım máselelerin sheshiwde járdem beredi.