%збекстан республикасы жо№ары

Sezim lirikası – intim lirikası. Bul termin latın tilindegi intimus sózinen alınǵan bolıp, sózlik mánisi boyınsha kútá tereń, kútá ishki degendi bildiredi. Ol
qaraqalpaqsha “pinhamı lirika” dep te júritiledi. Lirikanıń bul túri tánha lirikalıq qaharmanǵa tiyisli, onıń júrek tórinde jatırǵan sezimlerdi beredi.
Sentimentalizm – realistlik emes metodlardıń biri. Francuz tilindegi sentiment – sezim degen sózden alınǵan termin. XVIII ásirdiń ekinshi yarımında Evropa ádebiyatında hám kórkem ónerinde qáliplesken aǵım. Sentimentalizm wákilleri adam tábiyatınıń jetekshi tárepi aqıl-oy emes, al tábiyiy sezimler dep esapladı.
Sillabika – qosıq ólshemi. Grek tilindegi sillabi – buwın degen sózden alınǵan. Barmaq ólsheminiń ekinshi ataması.
Sillabo-tonika – qosıq ólsheminiń bir túri. Grek tilindegi sillabi – buwın, tonus – pát degen sózlerden alınǵan. XVIII-XIX ásirlerde rus poeziyasında, atap aytqanda Lomonosov, Jukovskiy, Tredyakovskiy, Pushkin, Lermontovlar tárepinen qosıq ólshemi keskin ózgeredi. Bular tonikalıq ólshem menen birge, sillabikanı da qosıp paydalandı. Nátiyjede, XIX ásirdegi rus poeziyasında sillabo-tonikalıq qosıq ólshemi payda boldı.
Scenariy – dramalıq shıǵarmalar ushın jazılǵan kórkem tekst.
Sintaksislik figuralar yamasa stilistikalıq figuralar. Kórkem sintaksiste qollanılatuǵın hár qıylı usıllar. Mısalı, ritorikalıq sorawlar, intonaciya, pauza, ritorikalıq qaratpalar, úndewler, tákirarlawlar, antiteza, inversiyalar kóp qollanıladı.
Sonet – italyansha sonare – jańǵırıw mánisin bildiredi. Sonet on tórt qatarlı lirikalıq qosıqtıń túri. Ol eki tórtlik, eki úshlikten yamasa úsh tórtlik, bir ekilikten turadı hám qatań uyqas formasına iye.
Stil – áyyemgi grek tilinde mum jabıstırılǵan taqtayshaǵa sızıp jazatuǵın ushı ushqır qálemsheni ańlatqan. Kórkem ádebiyatta stil kórkem usıllardıń (ádislerdiń) jıynaǵı.
Súwretlew lirikası – peyzaj lirikası. Lirikanıń bul túri adamdı qorshap turǵan zatlardı, qalanıń, awıldıń kórinislerin, sonday-aq tábiyat kórinislerin, qubılısların súwretleydi.