1. Kern-Yersek testi Grafikalıq diktant Uy, terek, adam

3. «Úy, terek, adam» (ÚTA).
Shaxstı izertlewdiń bul proektiv metodikası 1948-jılı Dj. Bak tárepinen usınılģan. Bul test balalarģa da, eresek adamlarģa da arnalģan toparlıq izertlewler ótkeriw múmkin.
Bul metodika shaxs haqqında, atap aytqanda, onıń rawajlanıwı, senzitivligi (psixikanıń rawajlanıwın támiyinleytuģın sensorlıq qásiyetler hám protsesslerdiń qolaylılıģı), iykemshilligi, jumıs uqıplılıģı, sonday-aq onı qorshaģan ortalıq penen bir pútin halındaģı hám konkret adam menen ayırım alınģan haldaģı múnásibetler sferası haqqındaģı informatsiyalrdı toplaw múmkinshiligin beredi.
Metodikanıń mánisi tekseriliwshilerge úy, terek hám adam súwretin soģıwdı usınıs etiwden ibarat. Sońınan islep shıģılģan joba boyınsha sorawnama ótkeriledi. Testtiń ózin orınlaw eki bólimnen: súwret salıw hám onnan keyin gúrrińlesiw ótkeriwden ibarat. Bul metodikanıń ózgesheligi sonnan ibarat, maģlıwmatqa bay jáne qaytalap ótkeriliwinde balanıń psixikalıq hám emotsional jaģdayı jáne rawajlanıw dinamikasın kórsetiwi múmkin.
ÚTA testin psixologiyalıq másláháttiń baslanıwında ótkeriw maqsetke muwapıq, sebebi ol konsultatsiya alıwshınıń tiykarınan qaysı birine tiyisli ekenligin anıqlawı múmkin.
ÚTA testi hár qıylı jastaģı patsientlerdi izertlew ushın psixo-diagnostikasında keń qollanıladı. Sózsiz, sorawnama metodı da, testti interpretatsiyalaw metodikası da óspirimlerdiń, sonday-aq eresek adamlardıń individual hám psixologiyalıq ózgesheliklerin baqlawda basqasha sıpatqa iye boladı hám jáne de tereńirek maqsetlerdi gózleydi.
Balanıń mektepte oqıwģa psixologiyalıq tayarlıģın anıqlaw barısında ÚTA testin paydalanıwdı bahalaw qıyın. Onı bir neshe ret qaytalap qollanıw barısında, máselen, mektepke shekemgi jastaģı balalardı mektepke qabıllaw hám olardıń baslawısh klassqa ótiwinde test bala shaxsınıń qáliplesiwi haqqında tolıq hár tárepleme informatsiyalardı bere aladı.


Testti ótkeriw ushın kórsetpe
ÚTA testin orınlaw ushın balaģa, yaki izertleniwshi balalar toparına bir bet qaģaz hám shártli túrde reńli qálemler menen óshirgish usınıladı. Testi ótkeriwde standart bir bet aq qaģaz ortasınan búklenip balaģa beriledi. Birinshi bettiń joqarısına bas háripler menen «ÚY», ekinshi hám úshinshi betlerine sáykes túrde «TEREK» hám «ADAM» dep jazıp qoyıladı. Tórtinshi betinde balanıń ismi, sháriypi hám izertlewdi ótkeriw waqtı jazıp qoyıladı. Eger balanıń ózi barlıģın bir betke salıwdı maqul kórse, onı toqtatıwdıń zárúrligi joq.
Psixolog balaģa aytadı: «Qolıńnan kelgeninshe úy, terek hám adamnıń súwretin sal. Adamnıń súwretin salģanıńda, ol er adam bolsın». Balanıń anıqlawshı barlıq sorawlarına psixolog juwap qaytarıwı kerek, bunda súwrettiń sapası hám onıń qanday reńdi tańlap alıwı, onıń salģan súwretiniń haqıyqatlıqqa sáykes bolıwı, áhmiyetli emes ekenligi balaģa túsindiriledi, eń baslısı, balanıń tapsırmanı berilip orınlawı hám úydi, terekti hám er adamdı qalay etip kóz aldına keltirse, solayınsha súwretlewine baylanıslı.
Tapsırmanı orınlaw waqtında psixolog balanıń háreketiniń ózgeshelikleri haqqında qısqasha jazıp alıp baradı. Ádette, gúbirlenip aytılģan barlıq sózler, barlıq is háreketler belgilep barıladı.
Bala súwretti salıp bolģannan keyin, oģan soqqan súwreti boyınsha sorawlar beriledi, soraw úlgileri kitapshanıń keyninde berilgen. Súwret boyınsha beriletuģın sorawlar gúrrińlesiwge ulasıp ketiwi hám balanıń qorshaģan ortalıqtı emotsional qabıl etiwi hám turmıslıq kóz-qarasları haqqında informatsiyalar beriwi kerek.